CorseCurte#05 – La pacare

#05 – La pacare

A cui domandâ? Achì nissun mi scolte. La pacare e je ferme e l’om de pacare al è li che al vauice che lui no lu à viodût, cemût podevial, cuant che lu à viodût, ah diu jo! al jere za dut sgnangassât!
L’assessôr i spieghe al inzignîr che dut al jere a puest, une robe compagne no si podeve spietâse! L’inzegnîr i spieghe al assessôr che lui il so compit lu veve fat, il plan particolaregjât dal gnûf cuartîr residenziâl e ancje il plan de demolizion des vieris cjasis, cjasatis malsanis, dutis malsanis fûr che une, propi chê lì, ma no i competeve a lui di. L’assistente sociâl, rivade di corse cu lis mans intai cjavei, i spieghe al mont intîr che jê e veve fat dut in ordin, vitis par cunvinci barbe Tin, us din un biel apartament, us fasìn dut nô, us puartìn vie la vuestre robe, le sistemin ben, ma la cjase o scugnin butâle jù, sì, o savìn che le vês fate sù vô toc par toc, e je biele, ma e je intal mieç di cheste porcjarie, no viodêso, arbatis, rudinaç, pantianis! Un scaraboç di firme i lu vevin gjavât fûr, dome di visâlu la dì prime che butavin jù, che lui al lave vie par no viodi e jo lu vevi visât, a vegnin cu la pacare, barbe Tin, martars di matine, cunvinte jo che al fos lât di cualchi bande.

E invezit?
Cui savê!
Si sa dome che cumò, puar om, recuie, al è dut sfracassât, che la pacare no va pal sutîl.
A cui domandâ par savê’nt di plui?
Salacor chê piere lì, chel bocon di piere e sa alc. E podarès conta che Tin le veve cjolte sù inte Tôr, le veve staronzade ben, sagomade cun maçûl e scalpel e le veve metude a tignî su la one grande dal cuviert. E li e jere stade par ducj i agns de vite de cjase.
Ma plui di cussì, une piere no sa.
E alore?
No puedarai mighe jo inmagjnâ ce maniere che Tin, cence fâsi viodi, al è sbrissât dentri inte cjasute, e al è lât a distirâsi sot di chê piere grande, a spietâ la pacare che e vignis dongje a sdrumâi la cjase. A puartâi vie la vite.
Parcè che chê cjase e jere la sô cjase.
Parcè che la cjase e je la cjase.

di ***
#22**

1 coments On CorseCurte#05 – La pacare

  • E culì Tinut al à volût afondà, come un bon cjapitani di nâf di une volte, sot il sudôr di chês pieris tiradis a scalpel e maçûl, inte sô grande volontât di alça un tet disore cuatri mûrs. Che Diu ti dedi il ben che tu mertis Tinut. Lussian

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît