CorseCurteMarç#04 – Fieste des feminis secont un om

#04 – Fieste des feminis secont un om  (ancje se jo o soi femine)

No mi plâs il vot di Març, cul so strac mac di mimosis compradis ai semafars.
O crôt che no sedi nuie di plui bausâr di fâ fieste a la femine in cheste zornade o dome in cheste zornade.
No mi plâs sintî fevelâ di cuotis colôr di rose. Mi samein i vivars che a puartin ai indians de Americhe,  intai cunfins da lis lôr riservis.
No mi plâs, nancje, viodi i locâi de gnot plens di cotulutis scalmanadis che no san minimamentri ce che a vûl disi il vot di Març.
In veretât, o ai i sgrisui cuant che o viôt che lis feminis laureadis e son plui dai oms, come numar, ma a scugnin lâ intal forest par podê dâ un sens a la lôr vite e al lôr studiâ.
Parcè che la partide cui oms no si zuie mai a la pari! Chest, no dome di cumò, ma dai timps plui antîcs.
Masse voltis, lis feminis a son vitimis di oms che no meretin di clamâsi cussì, che lis considerein robe di proprietât, fin al pont di copâlis, se a disin «vonde» o pûr «no».
Si conte che lis feminis a fasin vuere di simpri pa la paritât. E e je la veretât.  Jo o crôt che varessin di jessi no oms a barufâ par vele, la paritât.
Parcè che lis feminis a son parsore di nô, sot ogni pont di viste.
E, se lis feminis a combatin pa la paritât dai dirits al sucêt dome parcè che i oms a  doprin come arme la uniche robe che  – ancje se no simpri – a àn in plui: la fuarce fisiche. Cun chê si vantin, si crodin sflandorôs come i pavons cuant che a fasin la ruede.
E parcè lu fasino? Par vê la femine, po. A tornìn simpri culì.
Eco, a voltis, mi sint di disi di perdonânus: insom, sin dome oms.

di Pierina Gallina (Gjaline Padoane)
#1208