Vagon Gnot e S(a)lam Poetry

Intant che o jerin daûr a meti a puest la neste parince plui “virtuâl” o vin pensât ben di no dismenteâsi dal mont reâl, e cussì o vin za tacât, come che us vevin anticipât su la viere Ostarie, a lâ indevant cui apontaments di Contecurte intal vagon, che in cheste stagjon e à cjapât il non di VAGON GNOT.

Chest an, cun di plui, la schirie di seradis a Remanzâs dentri il vieri vagon, intal curtîl dal Laboratorio di Sant’Urbano, e sarà ancjemò plui siore, dant spazi no dome aes leturis des nestris Contis, ma ancje a poetis e musiciscj furlans, presentâts di Lussia di Uanis. 

Joibe passade, ai 14 di Otubar in vie da la Stazion 4, il prin apontament al è stât cu lis contis di ridi, e come che o sin usâts a fâ, lu podês za cjatâ inte sezion “Events e Leturis”, scjamabil in pdf.

Lis contis, gjavadis fûr, par la plui part, dal vieri blog “Contecurte” a son stadis presentadis dal Ustîr, compagnât di Checo, il Famei de Ostarie, che al è ancje il nestri letôr uficiâl. Il librut digjital, però, al à dentri ancje une jentrade scrite par la ocasion e une conte ancjemò inedite, su cheste Ostarie.

La rassegne e larà indevant par altris siet joibis, daûr chest calendari:

• 21/10/2010 – Viers in Viaç – Serade di poesie e musiche cun Stiefin Morat e Ulisse Viezzoli
• 28/10/2010 – Contecurte – Contis par no durmî (gjenar neri, gotic e di orôr)
• 4/11/2010 – Viers in Viaç – Serade di musiche e poesie cun Lussia di Uanis e Annalisa Masutti
• 11/11/2010 – Contecurte – Contis di paîs (gjenar romantic o di ricuarts)
• 18/11/2010 – Blues in viaç– Fabian Riz e Ulisse Viezzoli
• 25/11/2010 – Contecurte – Contis di fantasie (gjenar fantastic, fantasience, sureâl)
• 2/12/2010 – Blues in viaç– Laura Comuzzi (violin) e Eleonora Cedaro (ghitare)

La prossime serade, chê dedeade a lis contis in teme de gnot di vilie dai Sants, o sperìn che e sedi dute fate di contis gnovis e, al è clâr, che a fasin pôre!

No vin dome chêste gnove, par vuê, ma ancje une de ultime ore, par cui che doman di sere al ves voie di lâ a fâ un zîr a Codroip. La gnove e cjacare di poesie, ma sedi par chê a presentâ la serade, insieme simpri a Lussia di Uanis, al è l’Ustîr, e sedi par la particolaritât dal event, nus fâs plasê segnalâusal.

O stin cjacarant dal S(A)LAM POETRY, une gare jenfri poetis che, proponint lis lôr poesiis, si daràn bataie fin che di chei sedis che a partissin al restarà dome un, che al vinçarà un… salam!

Il biel de manifestazion nol è dome intal valôr leterari da lis poesiis presentadis, ma intal valôr dal public presint, che al sarà clamât a fâ di zurie. Insome, une gare di poesiis a l’ultin sanc, dulà che ducj a podaràn tignî al lôr poete preferît.

La serade e je doman, sabide 23 di Otubar, aes 19.00, inte salute des Cunvignis de Biblioteche di Codroip.