CorseCurteZenâr#22 – Mascaron angolan

#22 – Mascaron angolan

1978.
E je cussì fuarte la pôre che mi fâs chel maladet mascaron african inclaudât tal mûr che no rivi nancje a cjalâlu. Alì, picjât tai modons. Di eban neri come l’Infier, daûr di salams e barbonçâi.
Une flape lampadine onte e cragnôse e pindule e tacade al fîl come che e fos ancje jê un muset mufulît e rive a pêl a fâ lusôr a un metri.
Chel malefic mascaron angolan al è li in cantine parcè che nissun lu vûl in cjase. Chês voltis che i domandavi a barbe Pieri, che lu à menât de Afriche, mi rispuindeve simpri: “Al fâs domandis di muart. Al è seneôs di sanc”.
Cu la man o cjareci planc il butilion di neri. O sint il polvar de butilie come che e fos une ruspiose lenghe di gjat. Al vuiche il dêt tal veri. Un sgrisul mi ven sù fin tal cerneli. No si pues lâ indenant cussì!
“Jo no soi un cunin! Cumò ti cjapi e ti brusi tal fûc ce crodistu?!”
E vie fûr tal ort, insom, dopo dal strop des cartufulis. Fat sù un grum di fassinis, zontade une sclipigne di benzine cjatade tal garage e op alà disore il mascaron. “E cumò bruse maladet! Bruse bastart, cussì no tu fasarâs plui pôre a nissun de famee! Ce pensavistu di vêle vinte tu?!”
Passade mieze ore e reste dome cinise.
Gno barbe al à cucât dut il timp platât daûr dal morâr. Jo però lu ai viodût. Al vaìve… cuissà cemût mai… I sarà displasût pal mascaron, ricuarts di zoventût…
Ta chel claut là o sai jo ce picjâ cumò! Il sac di stropui par imbutiliâ cussì no ju piert plui.
Ma jentrant in cantine cul sac in man mi acuarç che il mascaron al è ancjemò là…
O scjampi fûr scaturît, no sai ce pensâ e o sbat intor di gno barbe. Cu la bocje fracade te sô panze o sint la puce di chel vilût pesant, maron, che al nase di bago e naftaline. Mi cjape pes spalis, mi slontane un pêl, fin a rivâ a cjalâmi tai vôi. “Zuan… mi àn a pene clamât di Udin… to pari al è muart!”

di Rudy Citòs (Borussia Dordul)
#1172

1 comment