Lets in Ostarie: Il Friûl vie pai secui

Il Friûl vie pai secui, La storie de Patrie che no ti àn mai contât.
di Walter Tomada, Fausto Zof
Feagne 2021

CE LIBRI ISAL?
Un libri di cuasi tresinte pagjinis, dividudis jenfri protostorie, preistorie e storie, cuntune prefazion di Agnul Floramo, une jentrade, un profîl dai autôrs e une tabele des etis storichis. Insiorât di fotografiis di epoche e di biei dissens.

MA CE ISAL DENTRI, DI PRECÎS?
La storie dal Friûl, viodude di un pont di viste dal popul, scrutinant dutis lis olmis lassadis des gjenarazions che a àn vivût chenti prime di nô. Storie che si insuaze inte grande Storie de Europe, par vie che il Friûl al à, des voltis, parfin anticipâts cierts muviments che a àn interessât il continent. E, naturalmentri, i Celts, i Romans, i barbars, il Patriarcjât, Vignesie, La Riforme protestante, Napoleon, la Austrie, lis vueris, la Italie e v.i.

MA CUI SONO I AUTÔRS?
Walter Tomada, insegnant e gjornalist, diretôr dal periodic La Patrie dal Friûl, al à lavorât intal ufizi-stampe dal Comun di Udin e pe golaine Docuscuele de SFF.
Fausto Zof, di simpri impegnât pe difusion de culture e de lenghe furlane, al à insegnât in plusors cors di furlan intes scuelis e inte publiche aministrazion. Ancjemò al insegne furlan li de UTE di Udin.

A CUI I PUEDIAL PLASÊ?
A ducj chei che a àn voie di cognossi a fonts la storie de lôr tiere e di oms e feminis che su cheste tiere a àn vivût e scombatût. A chei che a vuelin une storie che no conti dome di batais, di res e imperadôrs, ma che e scrutini la maniere che e viveve la int intes diferentis epochis storichis, fin in dì di vuê.

E SE O AI VOIE DI CJOILU?
Lì de cjase editore Corvino di Feagne, vie Pilacorte 2. Si pues scrivi a info@litostil.com o ben visitâ il sît www.litostil.com. Il presi de cuvierte al è di 20€.