Pôrecurte Day

Codroip, ai 30 di Otubar dal 2021
Sala Abaco

No si podeve propite lassâ scjampâ vie un an cence inmaneâ il Contecurte Day! Sì che, dopo che l’an passât o vin scugnût fâ l’event in linee, il CovidCurte Day, e al è vignût ancje ben, chest an o vevin propite voie di tornâ a tacâ di dulà che o vevin rot la robe, ven a stâi di Codroip, inte Sale Abaco. 

E la protagoniste, tant par scomençâ, e je stade propite la location, stant che e jere une sale super atrezade, dulà che a vin podût meti in vore lis nestris ideis, sedi pe senografie, sedi pe musiche, sedi pes leturis. Il teme, come che si conven a un event che si davuelç ae fin dal mês di Otubar, al jere chel des contis di pôre, fintremai di cambiâi il non al Contecurte Day e clamâlu… Pôrecurte Day!

Ma nuie… pôre, l’event al è restât compagn, inte sostance, cuntune grampe di contis a sfidâsi, letis di noaltris di Contecurte: l’Ostîr, il Berlon, la Sartore, la Massarie e ancje une Cjantore, a fâ ConFusion, une gjatemarangule a fâ di senografe e i Piçui Aiutants di Contecurte a judâ pe Lotarie. La serade, inneade di cocis, cjastinis, miluçs di picje, cjandelis, pizighets, striis, televoto, muarts scjampâts dal cimitieri, e je stade une vore vivarose.

La int, cundut che il Pôrecurte Day nol dure pôc, no je scjampade vie e al pâr che si sedin ducj divertûts une vore. Al à vinçût Laurin Zuan Nardin, che par vinci nus à invidât ducj a Sta a cjase! E cualchidun – ancje il vincidôr – al è lât parfin cjase cuntune coce, in gracie de Loterie des Cocis, che si sin inventâts. Anzit, o podìn dî che o sin i unics a vê doprât la senografie come premi pe lotarie!

Sul event, e su lis contis in gare, al è miôr sburtâ su la croniche in detai che o cjatais sul sît, che us puarte ancje a lei ogni conte publicade. 

• Articul su la ostarie cu la croniche dal event
• Event Facebook
• Direte Fb dal Event