Covid Curte Day 20

Sît di Contecurte, Març-Mai dal 2020

Il 2020 al è àn Bisest, e Bisest si clamave il spetacul che noaltris di Contecurte o vevin di meti in sene, prime che al rivàs il Covid, che al à fermât ogni manifestazion. Ma il Contecurte Day nus pareve brut lassâlu pierdi e saltâ un an, e cussì, come che si dîs par furlan: Nol è mai un mâl che nol sedi ancje un ben.

E alore o vin inmaneât la version dal Contecurte Day dute virtuâl, cu lis contis publicadis une daûr chê altre sul sît, la possibilitât di scoltâlis letis dai nestris letôrs (par cui che al vûl, ancje su Spotify) e soredut la votazion fate doprant la Liste di Contecurte, ven a stâi la nestre rubriche di gnovis, che o doprìn ancje par mandâ la Conte dal Mês. E i risultâts a son stâts une vore bogns!

I partecipants, ae fin, a son stâts chei di un Contecurte Day normâl, 12 di lôr, ancje se Chei di Contecurte a àn dât une buine man partecipant cuasi ducj. E i votants a son stâts 33, e tignût cont che par votâ bisugnave lei e scoltâ dutis lis contis, fâ la classifiche e dopo scrivinusale vie mail… a nô nus somein tancj.

La plui part des informazions li podês lei te croniche dal event, cun tant di classifiche in detai e statistichis di ogni sorte. Ce che al conte al è che la conte vincidore no si pues meti in discussion, parcè che e à vinçût cuntun bon margjin.
E je Astrid Virili, la nestre Sartore de Ostarie, che è à metût in rie Margarite e Checo e ducj chei altris partecipants cu la sô conte “Lis metamorfosis”.
Cun di plui, o vin vût il jutori, par chest event, di un personaç innomenât come Lupo Manarie, che al è lât a fâsi spiegâ dal Cont Ecurte cemût che si votave. E o vin di disi graciis ancje a chei di Radio Onde Furlane, che a àn fat di coparis a lis contis, metintlis in radio par dôs setemanis. E alore vele chi la classifiche des contis:

  1. Lis metamorfosis, di Astrid Virili
  2. Libars, di Margarite Cogôi
  3. ISS, di Checo Tam
  4. Dimensionomanimetri, di Rafaêl Serafin
  5. A cene cul Signôr, di Milio dai cjans
  6. Vir ius (Ah, om, la justizie) de Fuguline
  7. Miercus di cinise, di Galliano di Buenos Aires
  8. Prove di amôr, di Massim Furlan
  9. Isaac, di Franco Vigo
  10. Une bussade a comant, di Ivano Urli
  11. L’ordenadôr, di Marisa Gregoris
  12. La gote, di Laurin Zuan Nardin

La nestre Sartore e va a ponisi tal “Albo d’oro” dal Contecurte Day, zontantsi a Carli Pup (Sclaunic, 2019); Rafaêl Serafin (Passarian, 2018); Carli Pup (Flambri, 2017) e Mariute (Listize, 2016).

Riferiments

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît