Lets in Ostarie: Faliscjis, storiis di fûc e di fum

Faliscjis, Storiis di fûc e di fum
di Cristina Noacco

CE LIBRI ISAL?
Un libri jessût intal 2019, pe cjase editore Kappa Vu, 232 paginis, vincjevot contis furlanis cu la traduzion par talian, inricjidis cun sîs bielis ilustrazions, € 15,00.

MA CE ISAL DENTRI, DI PRECÎS?
Contis curtis (la plui lungje e à cinc paginis) che a si vierzin cuntun IMPIANT  e a si sierin con BIEL STUDANT. Si trate des fugarelis de Pifanie che ur fasin suaze a storiis di fruts, storiis di amôr, vite di comunitât e storiis di vite. E ven fûr l’anime di un paîs cun dutis lis sôs debilecis, contradizions, ingjenuitâts, ma ancje il sens di solidarietât e di partignince, la savietât.

MA CUI ISE LA AUTORE?
Cristine Noacco, furlane di Cortâl (Reane), e insegne leterature francese inte universitât di Toulouse in France. E à vût publicât une racuelte di poesiis par talian e par furlan, Morâr d’amôr, un volum di ricuarts su la montagne (Lo zaino blu), un carnet di viaç sul Maroc (Il gusto del tè alla menta), un libri di tescj e imagins su lis tradizions gjaponesis e, intal 2021 La via del Torre, une sorte di esercizi di leterature odeporiche che e pant dut l’amor de autore pal paisaç là che e je nassude e pe nature in gjenar.

A CUI I PUEDIAL PLASÊ?
A ducj chei che a i vuelin ben ae nature e che e no vuelin lassâ colâ inte dismentie i lor ricuarts di infanzie. A chei che a àn ancje un pôc di fastidi pai laudatores temporis acti e che no ur plâs masse di messedâsi cu la nostalgje, ma, cundutachel, a pensin che, inte storie dai nestris paîs, a jerin ancje tantis robis bielis. E che al è biel di leilis se a son ben scritis e ben contadis.

E SE O AI VOIE DI CJOILU?
Si pues provâ li de editore Kappa Vu di Udin, vie Çuian 42. Si pues ordenâlu ancje on line su shop.kappavu.it

1 comment