Il prin Contecurte Day

Listize, ai 31 di Zenâr dal 2016
Vile Bellavitis, Listize

La idee di meti in pîts une disfide di contis e jere bielzà di un pôc di timp tal cjâf dal Ostîr. E dopo vê fate la presentazion dal so libri “Contis di Famee”, la setemane prin a Sclaunic, e vê vude une vore di int a viodi e a vê gust di scoltâ storiis (e mangjâ e bevi subit daûr) ve che la robe e je saltade fûr di bessole. Un articul un pâr di setemanis prime, un biel event sul muselibri e soredut tancj, ma tancj contecurtârs che a àn vût il plasê di metisi in zûc e scrivi une conte par partecipâ.

Ae fin, chest Prin Contecurte Day, te Vile Bellavitis a Listize, cu la poie dal sportel di lenghe furlane gjestît di Venusia, al è stât sigure l’event cun plui int e cun plui contis (masse!) che si son sfidadis. Famei e Berlon a son stâts judâts de Camarele Lussia di Uanis, in pratiche ae sô scree te Ostarie, e Bizio e Franco, Cjantôr e Poete, a àn metût sunôrs e vuicadis. E je stade une vore di lavôr, daûr di chest event, ma ae fin o vin let contis par trê oris di file cence che nissun al movès il cûl de cjadree e al scjampàs vie.

A son stadis letis in dut 18 contis, che o podês cjatâ tal librut di scjamâ e ator pal sît, e plui di cualchidune e jere pardabon biele.
Il prin Re des Contis Curtis nol è stât un re, ma une Regjine, la nestre divine Mariute che cuntune conte une vore plene di tenarece e à comedât intun finâl di rileturis la conte dal Ostîr che fevelave di Cjampanii, e chê di Nello Malisano, che e fevelave di paradîs. Une edizion memorabile, dulà che tal public a jerin za chei che a saressin deventâts Dorondon, Cramâr e Massarie de Osterie.

Riferiments

• Articul di presentazion su Contecurte
• Event su Facebook
• Croniche su Contecurte