CC26Otubar#01 – La ruede dal Aleph

#01 – La ruede dal Aleph

Si lei tal Mahābhārata: “Par un che al è nassût, la muart e je sigure; e par un che al è muart, la nassite e je sigure. Al è dibant cruziâsi, duncje, par alc che al è za destinât a jessi”.
Chei che a dubitin de realtât de reincjarnazion a contindin che dutis lis animis che a àn vivût, e a àn tornât a vivi, tes etis antighis dal mont, no saressin dut câs avonde pai miliarts di umigns in vite cumò, intune, sul planet Tiere.

Jo no soi bon di rispuindi a interogatîfs cussì grancj parcè che il gno viaç al è pene tacât. Ta chest munistîr là che mi àn dât bon acet, o profiti di ogni ocasion par fevelâ cul Rinpocè. Vuê i ai dit: “Mestri Preseât, di cuant che o soi rivât o fâs siums che mi lassin scaturît. Se jai ves di contâ no samearessin robis cussì strambis – par jessi insiums, clâr – ma la sensazion e je une vore reâl e o pensi che, plui che fantasiis, a sedin visions che a rivin di lontan. Une matine mi jeri rimpinât sul cocolâr e di gnot mi soi insumiât di fâ e di disfâ grops sul arbul di une nâf e tal cîl o viodevi doi sorei. Chê altre dì o sborfavi i zîs che o ai puartât cun me dal munistîr di Polava ma o soi colât in imbast e mi soi insumiât, li par tiere, di ricamâ zâi fleur-de-lys tune bandiere blu. Compagn îr: o ai sclapât un grum di pieris par tornâ a fâ sù il mûr dal zardin e usgnot o ai crodût di jessi un minadôr a vore suntun asteroit dal Balteu di Orion. Ce vueliâl dî?”.
Il Rinpocè mi à rispuindût, pront: “no sarano fuarsi lôr – il minadôr, la ricamadore, il marinâr – che a si son insumiâts di jessi un om clamât Zorç Luîs Borcs, vignût di une tiere clamade Friûl fin uchì sul Tet dal Mont, par cirî di jonzi la iluminazion?”.

O intivi tal pinsîr, cumò, cheste sugjestion: e se ce che o clamìn reincjarnazion nol fos altri che parts di ognidun di nô in relazion cun altris parts dal univiers, intun altri lûc, intun altri timp?
E se ducj chei infinîts fruçons di vite a tornassin, par simpri, tai framents infinîts di altris daûr a vignî?

Materie: Matematiche
di…
#1934