CC26Setembar#27 – No doma una protesta

#27 – No doma una protesta

Sin tal 1511, intun paisut dal Friûl.
Çjamps e çjamps di blava e cereâi, di cartufulas e di cavocias a si estindin fintramai al orizont. A no son ni di un nobil ni di un patriarcja, ma da la comunitât di contadins che ai vivin aì, jenfri il bosc e il cjantâ dal gjal.
Pieri, un zovin dal paîs, al è sentât a ôr di un riul a cjalâ l’amont, cuant che al viôt rivâ una figura suntun cjaval.
«A mi mandin da la Republica di Vignesia!» al si presenta l’om, cjacarant cuntun fuart acent venit, «E vi domandi il paiament che veis di dâ par doprâ chestas tieras.»
Pieri lu cjala come se al fos mat. Al sa che la Serenissima a veva concuistât chel teritori di agnorums, ma a no veva domandât di paiâ mai nua. «Chestas tieras a son mês, e no ai di da nua a di nissun.» al rispuint.
«Inveza no, frut. A stan par jessi vendudas a di un nobil nassût a Vignesia. Cumò va da tô mari e to pari e visiu di dâmi ce che ai àn di dâmi.»
Nissun a ‘nt cjacara, ma a si sa: a zira vôs za da un biel pôcs di agns che la Republica di Vignesia a sta vint cualchi problema finanziari, encje par las bataias di concuista che a fâs cun l’Imperi Otoman. Intant che al cor a cjasa sô, pesçjant i pîts crots sul teren umit, Pieri al pensa: “Io ai di pierdi il mangjâ par las vueras di chescj achì, che nissun al sa nençje parcé che a las fasin? No, propit no soi dacuardi” Al riva a çjasa sô, al visa la sô famea dal om, ma ai dîs di spietâ: «Ai di lâ intun puest, prima che i fasetis alc» a ur spiega doma. Po, cemût che al è rivât, al sparìs di gnûf, cencia però tornâ dulà che al era vignût. Inveza, al si ferma denant di una çjasa ben diferent di chês atras. A è taronda, e duta piturada di blu. Dal cjamin, il fum che al jes al è vert. Al bat a la puarta decorada, e a vierzi a è una femina anziana: la stria dal paîs. Lu fas jentrâ e a siera la puarta: «Ce ca sucêt, Pieri?»
Lui a i conta dal om, e dal paiament che al vûl. «Capistu? Ai domandaran simpri di plui, e in pôc timp chest teren nol sarà nençje plui nesti!».
La stria a i pensa sù un tic, e cuntun colp di tos, a la fin, a i rispuint: «Calmiti e resona; se si ribelìn cumò, chest om di Vignesia che tu mi stâs cjacarant di lui, a nus mandarà l’esercit in çjasa. No, fasin un’ata rouba: daji dut ce che al vûl, e lassa che a vendin il nesti teren. Po, al sarà plui facil combati cuintri di un nobil di bessôl sul so teren che cuintri di duçj lôr. Agjìn cun calma.»
Pieri al fâs cemût che je i dîs. Al torna a çjasa, al si fâs dâ una part dal racuelt e la da al om, incussient che, chê che a sta par rivâ, a no sarà doma una protesta: a sarà propit una rivoluzion.

Materie: Storie
di—
#1929