CC26Setembar#26 – Il tramai

#26 – Il tramai

La stanzie insom dal puiûl e someave la grote des maraveis. O almancul cussì le viodevi jo, che no vevi il permès di lâ dentri. La puarte e veve i cancars molâts e e faseve un rumorat se tu provavis a vierzile. Une volte o jeri rivât a cucâ dentri, ma a part tancj lens no vevi viodût tant di plui. E po il paviment, carulât, al  someave pericolôs. Tun prin dopodimisdì, però, cuant che il cjalt al veve indurmidît mê none strache dal lavôr intai cjamps e mê agne e stave regolant la cusine, o ai olsât. Vierte ben planc la puarte juste chel piçul spazi par rivâ a jentrâ, inceât dal lusôr dal Istât, mi soi cjatât dibot tal scûr. Lens tancj che tu volevis e cualchi indizi de presince di pantianis. Insume, dute la mê passion si stave sfantant. Juste cuant che o stavi par rinunziâ ae aventure, però, no mi colie il voli suntune scjate di len, fate come une valisute. O savevi che alc o varès cjatât! La cjase di Pantianins no finive mai di mostrâ sorpresis. Cuissà ce che e veve dentri e parcè che a jere stade scuindude; bon, baste vierzile. Un plan neri cragnôs, a ûs di lavagne, un argagn cuntun rodul morbit e un pâr di tubets che a someavin di creme par scarpis. E cumò? Bon, di sigûr si dopre la creme: tirât vie il tapon e striçade la code a salte fûr une paste nere e grasse tant che la morcje dal ont. O provi a dâle ù pe taulute nere cul argagn, ma no rivi a capî cemût lâ indevant. Insome ae fin o moli, o met a puest la scjate e mi cjali lis mans: neris cuviertis di pês. Ce contio cumò a mê none e a mê agne? «Tu tu sês lât a zuiâ cul ”tramai”, lu vevi scuindût di pueste sot dai lens. No stâ a fâti viodi fintremai che no tu sês netât”; Di chê volte no soi plui rivât a cjatâ il ”tramai”; che mê none e veve fat sparî par simpri, ma almancul o savevi cemût che si clamave chê scjate di len. Dome tancj agns daspò mi àn palesât che chel ”tramai”; al jere un von dal ciclostîl e che no varès mai podût funzionâ cence il stampon di cjarte cerade e i sfueis. Un ”tramai”, par fâle curte.

Materie: Tecnologjie
di…
#1930