CC24Setembar#24 – Une sere di lune plene

#24 – Une sere di lune plene

La lune mi à infetade cul so ridi cence muse. Mi soi pognete su lis lastris di ciment dal gno zardin par cjalâle, protezude de cente di arbui e di plantis che mi platin dai miei vicins, de mê famee, dal rest dal mont.
O stoi cidine, o cjali. A ce pensio? No sai.
O stoi dome ca a gjoldi di chest lusôr di lune plene. Cuissà trops che come mê no rivavin a durmî e a son jessûts fûr di cjase, cuasi colpevui, cuvierzint a pas di gjat i metris che ur coventavin par cjatâ un puest scûr, sierât, ospitâl… dome par cjalâ la lune in pâs.
Mi cole intor une nole: TOC. O sint il rivocâ dal so colâ prime su di me e dopo sul ciment, tun moviment che al somee une fuide. Mi ziri sul flanc par viodi dulà che e je rimbalçade, cu la idee di cjapâle in man e strenzile tal pugn, cuant che il gno braç al incuintre alc di frêt e dûr, sul ciment. E somee une jeve, e à la forme di un fren a man. Ma ce fasie alì?
Cence pensâi masse parsore o cjapi la jeve e o tiri, dismenteantmi de nole.
Ce brute idee, mi dîs subit dopo, no bisugnarès mai fâ robis che no si sa dulà che a puartin o movi jevis mai viodudis che no si sa a ce che a coventin.
O sint un sfruiâ di viestis, un folpeâ di scarpis, un sunsurâ di feminis.
Il gjat de mê vicine, une vecjute curve che no mi salude mai, al scjavace il muret e al ven dongje. Strani, no lu à mai fat prime.
In chê lis viôt, a vegnin dongje, mi cjalin cence viodimi pardabon. Il gjat mi ven tal grim, o deventìn il centri di un cercli di feminis sclagnis, a pene iluminadis dal lusôr dal cîl.
O resti dulà che o soi. Lôr a tachin a balâ, compagnant i moviments cuntune cjante, dopo cuntune altre, e po cuntune altre ancjemò. Lis lôr vôs a tiessin tramis antighis, a niçulin i miei dubis e a dismovin i desideris. No sai plui ben se o soi une femine o un gjat, se o soi bore, flame o lastre di ciment.
O slungji il braç par cirî la jeve di prime, ma no la cjati plui. Forsit, insom, lu savevi, e forsit mi va ben cussì.
La lune e continue a ridi.

Materie: Tecnologjie
di…
#1926