CC26Setembar#19 – Une gnot che no si pues dismenteâ

#18 – Une gnot che no si pues dismenteâ

L’orloi al veve ben za batudis di un pieç lis vot e mieze. Fûr, tal paîs, al jere nulât e scûr di ploie. Pes stradis nol jere un cjan. Lis ostariis a jerin sieradis. Fintremai chê di Mario, ancje se si viodeve dal veri de sô puarte, slusorât di une lûs flevare, che dentri al jere cualchidun che al traficave. Al jere lui, che propit in chê sere nol podeve cuietâsi. Tal doman, li, a Varian, a rivavin cu lis lôr motos, centenârs di motocicliscj, pal radun, che lui come president dal moto/club al veve inmaneât. Anzit, cualchidun al jere za rivât. Dôs feminis polachis.
Par tant, al veve di preparâ lis cjartis, scrivi il discors par dâur il benvignûts. In fin, stampâ il sfuei cu la trate che tal indoman a vevin, cu lis motos, di fâ insiemi. E intant che si distrigave tai siei lavôrs al à pensât che e jere sabide e che a di chê ore al veve di impiâ la radio, par scoltâ “Indigo”, chel program di musiche che al trasmeteve Checo, che a lui, come radio condutôr, i plaseve tant.
Sacrament, il puar Mario, non si visave, che pe zornade dal doman, par fâ une prove, intai megafons, che za al veve sistemât di fûr, al veve tacât ancje i filaments de sô radio e cun di plui lis lûs; sfortune, al fos vignût brut timp.
Cussì a pene che al à piât la radio, a Varian al someave che al fos vignût di colp misdì. Dute la place e la vie principâl a jere slusorade. Cun di plui lis notis di une cjançon un pôc spirtade e à sveât dut il paîs. Lu si viodeve dai barcons che la int tes cjasis e veve piadis dutis lis lûs. La stesse che dut intun moment e je saltade fûr. Lis stradis in cuatri e cuatri vot a jerin plenis e soredut no mancjave la zoventût.
Cualchidun al varès volût lâ sù la coline, ma al jere masse scûr. Dome Lussian, il poete dal paîs, strenzint pe man une des dôs polachis, si è aventurât tal mieç des frascjis e dal agaçon par lâ a cjalâ cun jê lis stelis.
In chê gnot a Varian pes stradis ducj a cantavin o a balavin. Se tu passavis su la strade dal cimitieri tu sintivis ancje li cjantuçâ lis animis plui Santis. Ce biel! E nol bastave. Par fin l’aiarin cjalt che al jere vignût fûr, al veve sclarît il cîl e scjaldât i plui sfredulîts. Lu stes aiar che al veve puartadis lis vôs des musicantis e dai musicants che a jessevin dai megafons fin tes primis cjasis di Basilian e dai paisuts dulintor. Une vere fortune par Checo che mai come in chê sere nol veve contât tancj scoltadôrs. A Varian ducj a jerin contents, convints che di chê gnot tant biele il merit al jere propit so.
Par chest ae fin de fieste, chel om, tancj a volevin ringraciâlu. Cussì tal indoman une clape di Varian, cun Pitucje in teste, e je partide pal so paîs. Volevin informâlu, che par ricognossince, lu candidavin come Sindic tal lôr Comun. Pecjât che a pene rivâts inte place di Pavie, une siorute, che e veve capît che lu cirivin, cuntun fregul di premure intun moment ju à congjedâts. Vuê no lu cjatais. No sai se al è partît par un conciert a Manchester, o se al è montât sù di un di chei tramais che e puartin su la lune.

Materie. Furlan
di…
#1921

1 comment