CC26Setembar#16 – Piere-Slisse

#16 – Piere-Slisse

— Cumò vonde preât! — Al veve dit Piere-Slisse, grant strion de tribù dai Algos. — La Orele-Diestre dal Diu-Massebon e je passude des nestris invocazions. Bisugne sbisiâ la Orele-Çampe, chê de azion!
E metût intor il gaban risiervât pe fieste, al veve saludât la sô tribù e al jere partît viers il Mont-Spice.
Nissun si ricuardave une Istât dal gjenar. Il cjalt al veve consumât dut, dai cjamps di marijuane di Poche-Rico, fintremai ai orts sore jevâts di Clope-Cleve.La temperadure fisse di 48 grâts, ancje di gnot, e faseve parfin sclopetâ lis panolis, produsint cuintâi di popcorn.
Il Pitêr, la Sacre-Aghe, flum lezendari che al nudrive culturis e bestiis al jere ridot a un roiuç. I lavadôrs a spontavin des rivis come lapidis bandonadis, tal mieç de jerbe brusade.
Rimpinât fin su la piche, Piere-Slisse al veve implorât la vision di Algos, il Diu-Massebon, la Man-Cjarece, la Fantasime-Blu, no inacuarzintsi che al jere za comparît daûr di lui. Al saveve jessi un spirt spiritôs ancje tai moments mancul propizis.
— Ce ti puartial su la spice dal Mont-Spice, cjarissim strion?
— O stin murint di cjalt, Algos. La aghe e je cuasi finide, arbui e plantis a son stecs, lis gjalinis a fasin ûfs in antian. La Tiere-Buine e stâ sparint.
— La Tiere-Buine e je stade sfidade da l’om! No si pues tornâ indaûr. Il mont si suiarà come une poçale tal soreli! Aromai al è masse tart!
— E sarès une soluzion, Algos…
Il spirt al veve zirât il cjâf. I voi scocolâts a burivin lamps di futar, la muse e jere deventade a colp grispose. Piere-Slisse, colât in zenoglon, al veve dit par sot.
— Une sofletade, une sole, tant par ristabilî l’ecuilibri. Po dopo…
Algos al jere rabiôs in bestie. I voi a smicjavin il strion che al cjalave par tiere come un frutin che le veve cumbinade gruesse.
— Al è une vore di timp che no dopri il Pêt-Frêt…
Piere-Slisse nol veve cjacarât plui. Al jere lât vie, sigûr di vê convint Algos. Rivât a bas al veve sintût un sunsûr e subit une brise frescje su la schene.
L’om al veve une gnove pussibilitât.

Materie: Siencis
di …
#1918