ScueleCurte_Furlan10: Franc Fari, un cjâf furlan

Franc Fari, un cjâf furlan

Franc Fari, come che si firme cuant che al scrîf par furlan, al à realizât pardabon une vere rivoluzion sientifiche, o un gnûf paradigme come che si dîs inte sience, di dulà podê tornâ a partî par rifleti su ce che al vûl dî jessi e podê continuâ a restâ un popul. La grande novitât introdusude dal so lavôr in marilenghe e je la inedite analisi dal jessi furlans di un pont di viste sientific. Par chest la sô opare e à marcât un cambiament radicâl inte ricercje, vierzint un troi fondamentâl par rifleti su lis sieltis che nus spietin pal avignî dal jessi e sintîsi furlans. A diference di altris tescj che a tratin chestis tematichis, tal so lavôr Fari al pant une vore di esemplis e evidencis sientifichis a sapontâ lis sôs tesis, che cussì a cjapin sù une autorevolece particolâr, dismovint interès mai sintûts prime.

Il fat stes che, par tancj di lôr, il so libri Il cjâf dai furlans^[1] al sedi stât la prime leture complete par furlan al rapresente un salt evolutîf intal status e inte percezion coletive de impuartance de proprie lenghe.

In cheste lezion o scrutinarai la bibliografie furlane di Franc Fari lant par ordin.

Usmis e La Comugne

Tal 1990 al ven fûr il prin numar di Usmis – riviste par une gnove culture furlane e planetarie. Une autoproduzion editoriâl une vore fine, che e devente une sorte di manifest culturâl par un svariât grup di artiscj, inteletuâi, poetis, studiôs che, in part, a rivavin dal Coletîf pe Ecologjie Sociâl de Basse Furlane, e che a gravitavin ator dal Centri Sociâl Autogjestît di Udin, frecuentât chê volte di personaçs come Gilberto Pressacco, Federico Tavan, Sergio Ceccotti. In chel numar di Usmis al comparìs il prin articul sientific par furlan di Franc Fari: Parcè i popui fevelino plui lenghis al puest di une?^[2] Tal numar dopo, dal 1991, oltri a un contribût di un zovin Giorgio Agamben e une interviste al fisic teoric e benandant Sergio Cecotti, al ven publicât Sintî vôs^[3]. Tal 1992, sul tierç numar, Fevelâ plui di une lenghe^[4], e tal ultin numar, dal 1995, Ordin e magjie tal çurviel^[5]. A son lis primis versions dai cjapitui che, tornâts a viodi e slargjâts, a deventaran il nucli da Il cjâf dai furlans.

Finide, ma no sigûr disvuedade, la esperience di Usmis, tal 1997 si scree par volontât de cjase editore Kappa Vu la riviste leterarie La Comugne dulà che, za tal prin numar, al comparìs un altri tassel essenziâl da Il cjâf dai furlans, l’articul Cais e foncs tai rituâi religjôs dai prins cristians di Aquilee^[6]. E dopo, tal 1998, Sino nô furlans la miôr int tal mont? Neuroanatomie dal razisim^[7], tal 2000, Cui isal il paron de cognossince e de vite?^[8], e infin, tal 2012, Violence e compassion tes neurosiencis^[9]. A son cuasi ducj articui che, cjapant spont des problematichis dal Friûl e dai furlans, a slargjin lis ricercjis ben di là dai confins de nestre tiere e che i risultâts, par merit e par metodi, a podin vê ce fâ e interessâ ducj i popui dal mont. Anticipant ancje, in cualchi mût, i seguitîfs studis e publicazions di Fari su la neuropsicologjie des lenghis e des religjons, che a saran aprofondîts par talian, soredut su Identità culturale e violenza^[10].

Il cjâf dai furlans

Il parcè che Il cjâf dai furlans al sarès un libri fondamentâl, in cualsisei lenghe che al fos scrit, lu dîs Sergio Cecotti, inte jentrade ae seconde edizion dal 2005:

“Parcè che al presente, tun lengaç precîs ma comprensibil, i principâi risultâts jonzût di une sience zovine, la neurolinguistiche”. (…) “Un dai aspiets plui interessants dal libri al è la spiegazion sientifiche dal parcè che la molteplicitât des lenghis e je une ricjece. (…) La neurolinguistiche e je in stât di spiegâ, suntune salde fonde biologjiche e neurologjiche, gran part dal compuartament culturâl e de dinamiche des diferencis culturâls jenfri i popui, comprindude l’aspirazion dai popui a l’autoguvier (fin a lis formis patologjichis dal nazionalisim e dal razisim)”.

Il prin dai doi gnûfs cjapitui de seconde edizion al spieghe il rapuart fra epilessie e creativitât in artiscj come Van Gogh, Flaubert e soredut Dostoevskij. Tal secont, une vore divertent ancje se si trate di un libri sientific, l’autôr al rispuint a lis domandis plui frecuentis fatis dal public, inte lungje tourné di presentazion da Il cjâf dai furlans ator pal Friûl. Incuintris dulà che, in gracie dal so  fevelâ “franc”, Fari al à il podê di impiâ la curiositât e l’interès dal public. Une straordenarie capacitât di comunicâ concets complès cuntun lengaç sempliç, ae puartade di ducj, ma cence sbassâ di nivel la part sientifiche. Une cognossince metude al servizi de int, une sience libertarie.

Chei altris tredis cjapitui a son lis fermadis di un viaç inte cognossince, frontât cun rigôr sientific e ironie trasmetude de brilante rese de lenghe furlane sientifiche nassude, si podarès dî, cun chest libri. Lis tematichis di base si podin ingrumâ in trê sezions. La prime e met a fûc l’interès pal lengaç; la seconde, vierte dal studi sul çurviel bilengâl dai furlans, e je marcade di opinions vivarosis su lis problematichis dal dibatit culturâl in Friûl; la tierce e met a confront in mût brilant argoments dissiplinârs e interdissiplinârs. Mario Turello, te prefazion ae prime edizion (2000), lu definìs: “Un apel, impostât cun clarece radicâl, ae reintegrazion dal individui e ae molteplicitât des culturis”.

In particolâr, la neuropsicologjie de esperience religjose, che e sarà un dai seguitîfs cjamps di ricercje di Fari, e ven achì anticipade dal cjapitul Cais e foncs tai rituâi dai prins cristians di Aquilee, lânt dilunc il filon viert di Guglielmo Biasutti, Gilberto Pressacco e Renato Jacumin sul cristianisim di Aquilee. I siei leams cun l’Orient, in particolâr cun Alessandrie di Egjit, il gnosticisim e une gnove leture dai mosaics che e conte une storie diferente e uniche, che e mene drete ae origjin di un popul, chel furlan, e ae sô essenzialitât.

Gjornâl Furlan des Siencis – Friulian Journal of Sience

In seguit, Franc Fari al fronte la sfide de comunicazion sientifiche par furlan. Tal 2001 al partecipe ae costituzion, insiemi a Marzio Strassoldo e Sergio Cecotti, de Societât Sientifiche e Tecnologjiche Furlane. Associazion, ancjemò ative, che e organize congrès anuâi e e pubbliche il  Gjornâl Furlan des Siencis – Friulian Journal of Siences. Di chê volte, il periodic editât de Forum al à racuelt lis ricercjis, in dople version furlane e inglese, lis rassegnis e lis recensions di desinis di autôrs furlans e internazionâi. Ricercjadôrs, docents e professioniscj atîfs inte ricercje sientifiche, in Italie e tal forest, che a àn contribuît, traviers la publicazion, ancje su la rêt, a un corpus di miârs di pagjinis di leterature furlane sientifiche. De fisiche ae informatiche, de economie ae inzegnerie e gjeografie, la riviste e à di sigûr inzornât la lenghe furlane cun gnûfs tiermins dâts fûr dal mont sientific. Un strument util, duncje, per ampliâ il vocabolari furlan e no dome une riviste par sienziâts. Inte presentazion dal prin numar (2002) Fari, tant che diretôr editoriâl, al spieghe cussì la sielte di dâ vite ae publicazion: “Cumò ducj a san ben che la lenghe internazionâl des siencis e je chê inglese, prime de seconde vuere mondiâl e jere chê todescje. Par i sienziâts no je tante diference su ce lenghe che si dopre par spiegâ i risultâts di une ricercje. Dutis lis lenghis a van ben, che e esist la lenghe universâl de traduzion. La robe impuartante e jê chê di vê alc di significatîf di contâ”.

E su lis pagjinis dal Gjornâl Furlan des Siencis Fari al conte, simpri cuntun stîl interdissiplinâr, tantis robis significativis: Mecanisims gnervôs che a controlin lis sieltis des lenghis^[11], Epilessie e creativitât leterarie in Fyodor M. Dostoevskij^[12], Sui insiums di Aelius Aristide: une analisi neuropsicologjiche dai Discors Sacris^[13], Neurosiencis dal sium e dal insium tai invertebrâts^[14], La meditazion orientade a la mindfulness inte ricercje mediche e psicologjiche^[15].

Al partecipe ancje a lis ativitâts di divulgazion sientifiche in lenghe furlane realizadis de Societât  Sientifiche e Tecnologjiche Furlane cun altris articui sui cuatri numars de riviste Cîl e Tiere, publicade, simpri de cjase editore Forum, jenfri il 2014 e il 2016, come suplement al Gjornâl Furlan des Siencis. Cundiplui Fari al dâ un contribût impuartant ancje ae realizazion de serie televisive Sience Furlane, cun la regjie di Giorgio Cantoni, trasmetude de RAI FVG tal 2008. Ancje in chest câs si trate dal prin esperiment televisîf di divulgazion sientifiche par furlan. Une sfide impuartante pe continuitât de lenghe e de culture furlane ma che e podeve vê mani dome se i aspiets plui impuartants de contemporaneitât, come lis siencis, a vegnin coltâts e difondûts in marilenghe, doprant i mieçs di comunicazion plui adats. Une produzion, indreçade al grant public, pe promozion de lenghe furlane contemporanie, cualificade di une terminologjie specifiche e insiorade di neologjisims par tradusi i gnûfs tiermins dal mont sientific.

Manuâl di lenghistiche furlane

Tal 2007 al ven publicât un Manuâl di lenghistiche furlane^[16]. Curât di Franc Fari, al è il prin manuâl adat ae alte divulgazion che al met adun une schirie di contribûts sientifics dai miôr specialiscj che a analizin i diviers aspiets de lenghe furlane: Giovanni Frau, Federico Vicario, Franco Finco, Laura Vanelli, Paola Benincà, Carla Marcato, Alessandro Tavano e Elena Collavin, oltri al stes Fari^[17]. Un imprest di studi complet, sistematic e in sintonie cui studis contemporanis.

Il timp de meditazion

La publicazion plui resinte par furlan di Fari e je Il timp de meditazion – Neuropsicologjie, filosofie e spiritualitât^[18], publicât de Kappa Vu tal 2024. Intal libri si presentin lis lidrîs storichis des pratichis meditativis e i studis neurosientifics e psicologjics che a àn cirût di mostrâ la lôr utilitât intai ospedâi, intes scuelis e par dutis lis personis, di ogni etât, che a cirin di miorâsi, di cjalâsi dentri e di ecuilibrâsi, “parcè che ce che al è dentri di nô si spant ancje difûr”. Tal libri si conte ancje cemût che cheste pratiche si è dimostrade valevule par imparâ cemût scombati il dolôr, il malstâ psicologjic e tantis altri malatiis dal cuarp. A son i agns dulà che Fari al contribuìs ancje ae partence, inte Universitât dal Friûl, di un sisteme di insegnament de meditazion di cussience clamât Meditazion Orientade ae Mindfulness (MOM).

Une filosofie furlane

Il leam di Franc Fari cul Friûl al ven fûr ancje des sôs sieltis di vite e di lavôr, sedi tal cjamp medic che in chel academic, dispès leadis ae sô tiere di divignince, ancje se al varès podût cun facilitât lavorâ o insegnâ tal forest.

Fari al à metût in evidence cemût che il çurviel di ogni persone si sculpìs inte lenghe e inte culture dulà che al vîf. Ogni creature umane e je tâl parcè che e à une sô storie sculpide tal cjâf, e il scultôr e je la societât, il popul. Se si gjave un individui dal so contest di identitât si tire fûr un individui diferent, ma e je pussibile ancje la degjenerazion dai rapuarts stes: il razisim. E, come pes lenghis, ancje la religjositât dai furlans e presente carateristichis peculiârs, tipichis de culture contadine, cuntun ategjament viert e indipendent denant dai temis de religjon e de spiritualitât. Jessi furlans, inte vision di Fari, al vûl dî jessi partecips di dut chest, cul pat di inserî la proprie culture e il propri sisteme di valôrs intun circuit di verifiche empiriche. Dome cussì la difese de diviersitât linguistiche e pues cjatâ reson inte finalitât de diviersitât biologjiche.

Il pluralisim di Fari nol vualive lis diviersitâts inte omologazion, ma al ricognòs a ognidun il dirit di considerâ la sô marilenghe la miôr, e tal stes moment al stice a imparâ plui lenghis pussibilis par cjapâ sù une pluralitât di prospetivis cognitivis e culturâls.

E cheste e je sigûr une viodude filosofiche, che po’ e je la strade plui resinte batude de sô ricercje, come tal libri I fondamenti biologici della filosofia^[19].

Une filosofie moderne e necessarie, che e ten adun lis concuistis sientifichis e la vite biologjiche, la dimension psichiche e spirituâl. Une filosofie furlane.

__________________________________

^[1]     F. Fari, Il cjâf dai furlans, Kappa Vu, 2000-2005;

^[2]                  F. Fari, Parcè i popui fevelino plui lenghis al puest di une?; in “Usmis”, n. 0, 1990, p. 11.

^[3]     F. Fari, Sintî vôs; in “Usmis”, n. 1-2, 1991, pp. 46-47.

^[4]     F. Fari, Fevelâ plui di une lenghe; in “Usmis”, n. 3, 1992, pp. 36-37.

^[5]     F. Fari, Ordin e magjie tal çurviel; in “Usmis” n. 5, 1995, pp. 22-24.

^[6]     F. Fari, Cais e foncs tai rituâi dai prins cristians di Aquilee; in “La Comugne”, n. 0, Kappa Vu, 1997, pp. 71-81.

^[7]     F. Fari, Sino nô furlans la miôr int tal mont? Neuroanatomie dal razisim; in “La Comugne”, n. 2 , Kappa Vu, 1998, pp. 91-96.

^[8]                 F. Fari, Cui isal il paron de cognossince e de vite?; in “La Comugne”, n. 7 , Kappa Vu, 2000, pp. 49-66.

^[9]     F. Fari, Violence e compassion tes neurosiencis; in “La Comugne”, n. 23, Kappa Vu, 2012, pp. 11-18.

^[10]    F. Fabbro, Identità culturale e violenza, Bollati Boringhieri, 2018;

^[11]         F. Fari, M. Skrap, Mecanisims gnervôs che a controlin lis sieltis des lenghis, in “Gjornâl Furlan des         Siencis”, n. 1, 2002, pp. 61-78.

^[12]         F. Fari, Epilessie e creativitât leterarie in Fyodor M. Dostoevskij, in “Gjornâl Furlan des Siencis”, n. 3,       2003, pp. 31-67.

^[13]         A. Fabbro, F. Fari, Sui insiums di Aelius Aristide: une analisi neuropsicologjiche dai Discors Sacris,  in            “Gjornâl Furlan des Siencis”, n. 19, 2015, pp. 61-90.

^[14]         F. Fari, E. Pascoli, Neurosiencis dal sium e dal insium tai invertebrâts, in “Gjornâl Furlan des Siencis”, n.          19,         2015, pp. 93-111.

^[15]                    C. Crescentini, F. Fari, La meditazion orientade a la mindfulness inte ricercje mediche e psicologjiche, in               “Gjornâl Furlan des Siencis”, n. 20, 2015, pp. 41-66.

^[16]           F. Fari (a cure di), Manuâl di lenghistiche furlane,  Forum, 2007;

^[17]           F. Fari, Neurolenghistiche; in “Manuâl di lenghistiche furlane”, Forum, 2007, pp. 187-209.

^[18]           F. Fari, Il timp de meditazion – Neuropsicologjie, filosofie e spiritualitât, Kappa Vu, 2024;

^[19]    F. Fabbro, I fondamenti biologici della filosofia, Mimesis, 2021;

2 comments