CC26Setembar#10 – Biele, biele di murî

#10 – Biele, biele di murî

Jo o soi nade biele. Biele di murî!
E sarà maladete, jê e ducj i siei dissendents, fin al ultin nevôt», cussì al veve sentenziât il cjaçadôr di animis.
Dentri al lunc gaban neri, che al ondulave tant che une premonizion di tampieste, si moveve cu la sigurece di cui che al sa che il timp al è pleât al so volê.
Nissun, a Turin, al olsave incrosâlu.
Bastave une ocjade di scuindon par sintî il glaç intai vues.
Place Statût e tratignive il respîr. Jê e saveve che la sô prossime prede e varês sintût il riclam.
Il cjaçadôr al impugnave il falcet e il taroc cence non, clamant Lucifar sore la ponte de Fontane dal Frejus.
I balave il cjâf tant che une cjampane di muart dome intal viodi la panze sglonfe di mê mari. Jê e jere ancjemò une frute, ma bielzà la magjie nere si slargjave te sôs venis.
Jê e saveve che ogni traume al robe un toc di anime. E che dome il cjaçadôr al varês podût tornâiale.
Jo, Clotilde di Turin, o spant profum di violis e injustizie di svindicâ.
Jo, scritore maladete, o soi costrete a puntinis e lustrins par salvâ la muse di cui che mi à cjapade sù in fasse e progjetade par fâ gjoldi a paiament.
Il gno cuarp nol è gno, a disin.
Ma la mê vôs, no, nissun al pues puartâmale vie.
Jo o âi piel di peraulis, cjavei di agnul, flancs di fâ zirâ il cjâf e pipinis sglonfis di indemoniade magjie.
Jo mi pretint e o spudi blastemis cidinis, fum e urine bulinte.
Il bust mi strenç i flancs intune smuarse feroce.
Ogni respîr al è une sfide.
Ma la mê pene, vuarfine di ingjustri, no si strache mai di scrivi intal aiar.
Jê e sa e cognòs la mê veretât, ancje cuant che nissun al vûl scoltâle.
Suspîrs e voi sanganâts mi tegnin di voli.
Animis danadis son prontis a scrodeâmi.
Dome Turin, dulà che dut al è scomençât, mi pare.
Inalore o mi plei e mi iluminei di scûr.
Il cjaçadôr di animis, vuardian dal neri, al trionfe ancjemò… ma il so podê al vîf dentri di me, cumò.
O soi nade biele, jo. Biele di murî!

Materie: Furlan
di—
#1912

2 comments