CC26Setembar#07 – Bon Sanc

#07 – Bon sanc

Il soreli difûr al jere cussì fuart che al brusave i neurons di chei che a lavin a fâ jogging tal dopomisdì. La stagnole pal crack e jere dute sparniçade tal paviment, zalat e plen di maglis, e la ultime sedon e jere butade intun cjanton, dongje de stue plene di crostis neris come il spirt di un danât. Lui al lere disfat, tal liet, fetent di sudôr metalic.
Stuf di dut. Il singul di Bela Lugosi’s Dead che al bramave di agns al jere par tiere, a tocs come la sô voie di stâ in chest mont. Nol veve plui nuie, dome cuatri francs par une bote, il gjel par tirâ sù i cjavei, la sô gjachete di piel dute carulide e un libri di contis di Matheson sporc di cinise.
Cemût vevial fat a ridusisi cussì? Aromai al jere tart par tornâ indaûr. Une bire dal discount, un plat di paste cusinade la dì prime e al tornà a butâsi ta la cove: tant, cun chel cjalt nol varès rivât a fâ nuie, figurinsi jessi di cjase.
Alc lu svee di bot. Un lamp inceant, une lûs fuarte par dute la cjase e un sens fuart di paranoie. Dai omenuts brututs e verdulins a comparissin dal nuie, passant traviers dai mûrs e cjalantlu cun voi grancj e fluits. Ce ostie, al disè, ce brut viaç.
Nol rive a movisi, al sude come un purcit e vonde. Distirât, al viôt chês besteatis vignî dongje, suturnis, ma cence tocjâlu. E cumò, ce fasino? No fasin nuie: a movisi al è dome lui, che al scomence a vongolâsi par aiar, lant cetant dongje dal sofit che al piert i sintiments pe pôre di sfracaiâsi cuintri dal lampadari.
Si svee, plen di mâl di cjâf. Vierzint i voi, al viôt par un pâr di seconts la lûs fuarte. I ven sù une fuarte nausie e al bute fûr il gustâ di dute la setemane passade, intant che te stanzie al torne dut scûr. Cumò al rive a movisi e a butâ vie la maiute plene di gomit. Al cjate un sfuei picjât ta la puarte: “Graciis par il to contribût a la sience, ma il to sanc al è masse ruvinât.” Firmât: i aliens.
Madone Sante, podeviso almancul puartâmi vie! Al dîs.
Stuf, al cjape un pâr di fuarpiis e li ficje dentri de corint, restant fulminât.

Materie: Furlan
di…
#1909

1 comment