CC26Setembar#02 – Jo o soi CRS

#02 – Jo o soi CRS

0304 di mistîr al manovrave une ruspe intal implant di ricicli 7 de provincie 2 de regjon 10. Al jere un lavôr come un altri, intun puest come un altri, intune provincie come une altre e intune regjon come une altre, dome che la sô e jere la regjon 10.
Ogni dì jevâsi, il telegjornâl CRS là che a fevelavin dome de capitâl de regjon 10, bevi un cafè CRS, meti sù la divise CRS, fâ 8 oris tal implant CRS e… vonde. Juste dôs voltis al an al lave in feriis, ma mai fûr de regjon 10: li a vevin lis miôr splazis e implants par schiâ, e lui al veve imparât a nadâ tal mâr CRS e a schiâ intun cors CRS su lis monts CRS, cu la nêf CRS, clâr.
0304 nol veve amîs, aromai a jerin cuatri gjats te Regjon 10, un pôc parcè che no si fasevin fruts, ma ancje parcè che tancj a murivin no rivant insom ar code par lâ a curâsi intun ospedâl CRS. Cun dut achest, lui nol jere avilît… ma nancje masse content. Al jere dome, disìn, vîf. O miôr, tal mont. Tal mont CRS.
Ma une dì, lant a vore, 0304 al incrose un frut. Agnorums che nol viodeve fruts te regjon 10! Il frut lu cjale e i dîs alc che nol capive. “Ah viodistu, sigûr nol è di chi. Al sarà un forest…”
Il frut al veve capît che 0304 no lu intindeve, alore cul dêt i ponte la divise, che in chê dì le veve maglade bevint il cafè CRS.
“Ah chest? Al è cafè! Sporc… magle!”
Ma al frut no i interessave nuie ni de magle ni dal cafè, al voleve savê ce che e jere chê scrite, chel “CRS” che te regjon 10 si leieve pardut.
“Aaah! Sigûr, chest al è… spiete. Ce jerial? Dai al vûl dî… sù mo, dai mo…”
Oh, nuie ce fâ, no i vignive! Eh sì che se e jere une robe sigure te sô vite, e jere chê di jessi braurôs di jessi CRS. Dome che, ce volevial dî?
Lui e il frut si saludarin cul chel dubi e no si vioderin plui.
Dopo vot oris passadis cun chê cuistion inclaudade tal pinsîr, 0304 al tornà cjase e al le di corse a cirî sul dizionari chê sigle.
“Ooh, ve chi la definizion, alore:
CRS: acronim neutri standard, pacificadôr, patrioric, bielissim, perfet, e gjeniâl che al è ae fonde de nestre identitât. Jentrât in vore cul Decrêt di Standardizazion dal President de Regjon 10 numar 01 dal 2099: “Normis in cont de Cussience Regjonâl Standard”.

Ve chi! Al jere facil…

Materie: Lenghe Foreste
di…
#1904