CDC03 – Scalembri

CDC03 – Scalembri

Ducj mi disin che o soi scalembri. O soi propit vignût sù stuart no par vie di jessi gobo, chel no. Par vie che o fâs lis robis a cjan e mi cjapi cualchi libertât in plui ancje cuant che no varès di fâlu. Come inte bande. Par fâ il bulo cu la mê part di sax, eseguint “Sul ponticello”, o sunavi inte otave alte e o stevi parsore di ducj. Cussì il nestri mestri mi veve cjastiât: mi veve dât lis parts dal cuar. Alore o scugnivi fâ dome popopo popopo: une vergogne par me che o ai simpri amât la melodie. Jo, che no viodevi la ore di compagnâ lis trombis tal atac de maestose e epiche marcje “Terzinando”: papapapaaa papapapaaa papapa papa papapaaa…

Ven a stâi che par vie de punizion cu la part di cuar mi soi ancje stufât e o ai dât lis dimissions de bande. Ma nol è dome par chel; o jeri stuf di lâ fûr a sunâ ogni domenie cuant che i miei amigos a jerin ducj in discoteche. E cussì o ai tacât a lâ ancje jo a balâ e a rimorcjâ fantacinis in discoteche, come chei de mê etât. A mi mi plaseve Manuella, chê cul nasut di purcitut. E veve un aspiet gjermanic, i cjavei moros cui frisé e par un periodi no si lavave parcè che e leve ator cui metalârs e lôr i vevin dit a jê che i metalârs vêrs no si lavin. Po dopo e à cambiât, par fortune.

Jo o vevi desideri par jê ma o vevi un rivâl in Ildefonso, il mecanic, chel che al robave i montons intes machinis dai paninârs. Montons come gjachetons, eh? No la bestie vive!
Par lui vierzi une puartiere di machine al jere une monade.
Mi veve ancje menaçât chel bulo! Vuai se i tocjavi Manuella! Ma jo, di scalembri che o soi, mal soi fat nemì e lu ai frontât sul sagrât de glesie. O ai durât dîs seconts. Mi à butât par tiere e mi à poiât il scarpon anfibi tal cuel a risi di scjafoiâmi. Alore mi soi rindût e i ai lassât cjamp libar cun Manuella.
Bon. O ai sbalgjât. O podevi restâ inte bande invezit di lâ a mangjâ fum e a balâ musiche ridicule inte discoteche e fâ chês figuris alì.
Invezit di dâmi supuart chei dal paîs mi àn coionât.

di Affori (Checo Tam) – peraule clâf: Scalembri
#1890

foto adalt: Il sugjeridôr – Carlo Bevilacqua (dal archivi CRAF)

1 comment