LCPBDM #1.4 – Machine gnove

Richard Scarry

Machine gnove. Sì, machine gnove. E no di seconde man. La tô prime machine gnove. E no tu sês un che al à mai vude passion di machinis, nancje di zovin. Che po… prin dai cuarante si è ancjemò zovins, no. Soredut se si à une machine gnove. E tu le âs paiade, sì. Par vele come che tu volevis tu, dal colôr che tu volevis tu, cun dentri ce che ti plaseve a ti, cence nancje mateâ masse sul presit. E no parcè che tu sês siôr. Anzit. Tu sês puar. Ma al è propite parcè che tu sês puar che tu ti sês cjolt une machine cussì, che di fûr e somee a une machine di siôrs, di fighets, cun chel colôr lustri che tu lu âs dome tu, di chês bandis.

Parcè che la int no le capìs, cheste maniere di spindi di un puar. No ti bastavie une Panda? ti disin. Ce maniere di straçâ bêçs… e invezit al è il contrari. Un puar nol cambie machine ogni altre dì, un puar al cjol une machine cussì, inte vite. E al pues valê par un maion, un gjubot, un pâr di scarpis… Par te e je stade la machine. E cumò e je rivade.
E tu âs fat dut come che si conven, sigurazion, lavade la vecje Fiesta, saludade cuntun pôc di displasê pensant sedi a lis taconadis e sedi ai incidentuts fats cun jê, che ti sbalinin la vite te stesse maniere par altri.

Ma la machine gnove e je li, che e spiete di jessi inviade. Il tipo ti à spiegât dut, ti dîs che si viodarês dopo i prins 10.000 km, e ti dîs ancje dulà lâ a fâ benzine. No il plen, che no tu âs ancjemò fate la tessare. Tu sês puar, visiti, tu âs di sparagnâ. E pene metûts chei 20 euros, la prime robe che tu fasis, inneât inta chel odôr di gnûf che al comande parfin sun chel di femine, e je chê di impiâ la radio. Tu varessis voie di coneti il bluetooth e di sielzi ce meti, ma miôr vuidâ, e cussì tu lassis al câs. Anzit, al destin.

E il destin ti contente. E partìs une cjante che al è agns che no tu le sintis, di un disc che ti plaseve une vore e chê cjançon li e jere propite chê che tu metevis simpri il repeat e tu tiravis sù il volum. Da rest e je la miôr dal disc. E alore tu partissis dal distributôr sgomant e tirant sù il volum come une volte. Ti pâr di vê dîs agns di mancul. Tu ti sintis biel, fuart, in forme. E no tu rivis a fâ di mancul di movi il cjâf a timp.

Da rest, cheste ca, e je la cjançon plui biele dal mont.

NI**AS IN PARIS, Jay Z  /Kanye West, Watch the Throne (2011) [3’39”]
(o visìn che il video al è sconseât a lis personis cun epilessie)

Il toc perfet par une machine gnove al è chel di un disc che pardabon al à cambiât alc, fissant un prime e un dopo. KANYE WEST al varà i siei fastidis e aromai nol fasarà altri di compagn, ma WATCH THE TRONE, dal 2011 al reste une di chês robis che a dividin di un prin a un dopo. E cuant che al è cussì no bisugne tant cjalâ cui che al è l’autôr ma ce che tignîsi ce che al à fat di bon. Forsit, come ducj i tocs che a zontin alc intal mac des cjartis in zûc al è dal sigûr invecjât, ma NI**AS IN PARIS, dulà che ancje JAY Z coautôr al jere al so top, al reste un toconon.