Ondefrute: Lupo Manarie al da i numars

Lupo Manarie si jere sveât e al veve cjatade la cjamare plene di int! E no dome int.
Ducj che lu cjalavin, inpins ator ator dal jet, a jerin, tal ordin:
Un scaladôr, un om preistoric, un gjenerâl militâr, un pilote di aereo, une atlete di gjinastiche ritmiche, la sô mestre des elementârs, un sbilf, une volp, une vacje, une gjirafe, un gneur, Babbo Natale, Michael Jordan e… la Tor Eiffel
Cence nancje lassâi tirâ flât a vevin tacât ducj a fevelâ:
«Dai mo jeve che o vin di lâ sul mont di Cuar, a bevi cul ors un tai e un glotâr!»
«Dai muuuu, anìn a pascolâ cun me par un an, che tu deventis un Lupo Vegan!»
«E scomence a metiti la divise e i ocjai, che o vin di lâ tal trafic a imparâ ducj i cartei stradâi!»
«E stant che o a viodude une grande buiace, cjol la sclope che di un dinosauro o vin di lâ a cjace!»
«E no stâ businâ e fâmi deventâ sort, che la slite e je pronte e o vin di lâ al Polo Nord!»
«E puarte vie ancje la cufie e il costum, o vin di lâ in Venit in pissine a bati il recort dal mont»
«Vierç ancje il pac che ti ai puartât par Nadâl, e je dentri une biele moto ancje se al mancje un pedâl!»
«E visiti di meti il pilote automatic al motôr, che un aereo mighe al svuale di bessôl!»
«Tu âs ancje di vignî cun me a la maratone di Rivis, che tant jo soi un gneur e devant di me no tu rivis!»
« Lupo, sull’attenti, in marce par lâ in vuere, cun elmet e stivâi a concuistâ l’Inghiltere!»
«Ma prime e je la gare di gjinastiche di fâ, piruetis e marculis par une medae d’oro di cjapâ!»
«E se a basket tu âs voe di jessi fuart come me, tu âs di mangjâ viers e grisons, ma jessint plui tenars al è miôr i seconts!»
«E par finî in bielece, tu podaressis rimpinâti parsore di me, che cussì tu viodis dut Parigji fin al 2033!»
«Ma vonde!» Lupo Manarie al veve sberlât. «Puar me! O stoi dant i numars!» ma in chel al cole dal jet e… si cjate sveât!

di Rafaêl Serafini, cui fruts
de primarie di Rivis d’Arcjan
#1852

Scolte la storie lete dai fruts de primarie di Rivis d’Arcjan