Tu Scrivarâs une Conte – La Croniche

Lu savìn che sês in spiete, ma l’Ostîr al à ancjemò di ricjapâsi de mega serade dal 8 di Fevrâr che dopo tante preparazion lu à par dabon stracât… eh sì, parcè e je stade une SE-RA-DO.NE!

Si veve viodût subit che al jere un bon clime… Inte cene che o varessin fat subit daûr de serade a jerin bielzà prenotâts in cuasi 40 e mighe dome mus! O vevin une super grampe di Chei di Contecurte (Ostîr, Famei, Sartore, Berlon, Peteçon, Muini, Gjatemarangule, Piçui Aiutants…) e in bande di chei cualchi contecurtâr storic come Massim Furlan, Stiefin Morat, Carli Pup… i membris de Zurie (Raffaella Corrias, Donato Toffoli) e une biele grampe di mus e mussis che a jerin seneôs di scuvierzi dut de corse (Pierina Gallina, Fulvio Romanin, jenfri chei dispatussâts e Alessia Meacci, Francesca Giorgetti, Alessandro Valoppi jenfri chei plui de ultime ore). Ma dopo a jerin ancje doi mus drets di Baires (Eduart Baschera e Noemi Salva) e al spetacul, dut câs, o vin vût ancje la presince e il contribût de Coghe e de Massarie! In sumis… e je stade une super fieste e al covente pardabon lâ par ordin.

O vin tacât cun cualchi sistemazion di fâ dal pont di viste logjistic, stant che in bande di ducj chei de premiazion e jere une vore di int che e jere vignude dome a viodi il spetacul e o vin monopolizât dut l’agriturisim dai Pituei, jemplant no dome la nestre taulade e lis cjadreis che o vevin metût in bande, ma dut câs ancje une altre taulade che di bon che a son rivâts sul tart. Si che duncje, o vin tacât cun cualchi dât de CorseCurte... Par esempli chescj ca, che us lassin chi sot:

Ben, no mo? Benon!  Dopo di chest o vin presentât i mus in gare, par cui che no ju cognosseve… e l’Ostîr al à vût un valet di ecezion, ven a stâi il super Famei Checo Tam che al à let un pôc di dut, dai nons dai mus a une frase par ognidun di lôr. Ve ca, par rinfrescjâus la memorie la presentazion dai 31 mus in gare, fate dal Ostîr in persone, in rigorôs ordin alfabetic…

1. Atile, al è miôr tignûlu ben peât
2. Brene Sfolmenade, problemas di “gestione della rabbia”
3. Bultrik, o vin capît ducj parcè che al à di scugnî cori
4. Catine la Nere, in pendant cu la politiche atuâl
5. Chel di Cormons, sal rivave di là, clare che al è partît za strac
6. Daisy, saltade fûr di un cartone animato
7. Daûr la Lavagne, un mus che al sa cual che al è il so puest
8. Derna, forsit son dôs, stant che a jerin tre e jere Terna
9. Fuschi, participi passât, seconde persone singolâr, Tu fuschi.
10. Gato, un mus cu la crisi di identitât
11. Ghiringhel, che no savìn se lu mangje o se al è lui, il ghiringhel
12. Gjino, Classic Friulian Mus
13. Glorious Grene, musse cun crisi di identitât… linguistiche
14. Incocalît, nol podeve rivâ lontan… masse autoironie
15. Ippogrifo, altri mus cu la crisi di identitât, cun di plui deliri di fantasie
16. La Ciachegna, clare musse infiltrade dal forest
17. Mari de Gnot Nostrane, par spaurî fruts, ma in maniere normâl,nostrane
18. Matungo, mat come il vueli
19. Muspilli, forsi al à falade une vocâl par vê la bire: Mi spilli, si dîs
20. Nevio, Classic Friulian Mus, ma di montagne
21. No Ancjemò, Al è miôr no domandâi se al è za rivât
22. Nonio, al dîs simpri che nol è stât lui
23. Ombre Grise, plui che un mus un ossimoro, anzit un mussimoro
24. Secretariât, cuant che si cjape un mus par un cjaval
25. Siruc, al è za tornât indaûr
26. Stele Alpine, altre crisi di identitât, ma ancjemò plui grave
27. Teresine la Çuete, musse che no je plui in garanzie
28. Tiremole, un râr câs di musse ruminante
29. Torototele, di leterât a aliterât al è un marilamp
30. Vercingetorix, altre crisi di identitât, ma plui storiche
31. 32, al à confondût i nons cui numars e stant che denant al jere il 31…

Vês intivât il clime de serade, no? E dopo di chest o sin partîts come frecis a lei la classifiche e dâ i premis… Eh, sì, parcè che ducj i mus a àn vût un atestât di merit compilât a man de gjatemarangule, la nestre senografe, e firmât di pene dal nestri Ostîr e nuiemancul di Ticât dai Mus, cul so çocul! Ve che us lassin un vueit cas in bande, juste par capî trop biei che a jerin (a chei che no jerin i mandarìn un colomp digjitâl pe consegne).

Vonde cussì? Ma ce! O vin lete la classifiche di Dicembar, ma cence spiâ lis primis 5 posizions, par no gjavâ la suspence de vitorie finâl.

E juste par poiâ ju la cifre de serade, la nostre Coghe Serena e à let al public la conte “Murî” di Atile (cumò podìn dî che al jere Pieri Moràs) inmagant ducj. E la conte, in cuistion, e jere rivade seste a Dicembar… imagjinait cemût che a jerin chês altris! E dopo, o vin metût impins une altre cjatade dal Ostîr par movimentâ la serade. Ogni mus presint che al vignive a ritirâ il premi al veve di sielzi a câs une detule sul mus che lu rapresentave, i varès cambiât la serade… o forsit cuissà, la vite! Sêso curiôs ancje di chês? Velis ca, dai, che us a lis lassin… anzit… spietaisi des gnovis cun chestis detulis!

• Il mus plui bon al cope il paron
• Il mus no si spele e il mierli nol devente blanc
• Cul timp al mûr il mus cundut il peçotât
• Bisugne savê menâ il mus pe glace
• Mai plui cjaval il gno mus
• Se il mus nol fâs la code a vincj agns, no le fâs plui
• Al mangje plui vene chel mus che nol tire la carete
• Il mus là che al è colât une volte nol cole plui
• Al mus vecjo, jerbe frescje
• La code dal mus e clope ma no cole
• Cjapâ un mus par un cjaval
• Dome al mus nol cole mai il pêl
• Bisugne fâ come il mus che al va indaûr par lâ indenant
• E je simpri stade che il bo
• al dîs al mus che al à i cuars
• A fâ dal ben al mus si vanze pidadis
• Al tocje peâ il mus là che il paron al comande
• Il mus nol è il cjan al mene la code par dibant
• A son cetancj mus che si somein
• Bramazion di mus no rive in cîl
• Il mus al è bon par tirâ sù la cjase, ma no par cjantâ in glesie

Bielis, eh… Une vore! Ma no fasevin dome chest, par un mus o une musse. O leievin di ognidun une frase o un incipit di une conte, e o vin fatis ancje un biel pocjis di fotos, ma soredut, se o vês pierdude la serade, O VIN FATE LA DIRETE FACEBOOK! Vait a viodile, se volês. E dutcâs o scugnivin, stant che un mus su trê nus scriveve de Argjentine o dutcâs di lontan e cussì o podìn svantâsi di vê fat un spetacul mondiâl! (Velu ca in bande Eduart Gato Baschera, vignût di puest di Buenos Aires pe premiazion).

E al pâr ancje, o in sumis, cussì a disevin, che ducj i mus cui plui cui mancul a sedin stâts une vore contents de serade e ancje di vê fâte fature par un an intîr (anzit, cualchidun al pareve vê za voie di tornâ a tacâ).

O segnalìn, jenfri lis tantis robis capitadis, la leture de conte Gjenodane Pilocapgi, de bande de nestre Massarie, che e je stade sanzionade in vie informâl stant che parsore de musse si jerin platâts ancje doi fruts, cence spiâ che a jerin, che a àn judât Francesca Giorgetti-Daisy a scrivi la conte… O segnalin il super plaçament in classifiche di Incocalît che al platave dôs mussis, Alessia Meacci e Patrizia Torossi, che fin a cualchi timp indaûr il furlan no lu savevin nancje e lu àn studiât di pôc.

O segnalìn la sgrimie di mus come Bultrik-Laura Dri, che par furlan, prime de CorseCurte, no vevin mai scrit nuie. Par no fevelâ da lis posizions dai nestris di Contecurte, che a àn pardabon fat une biele figure. Checo_Derna_Tam al è 15sim,  Glorious Grene, la Massarie Margarite, e je rivade nuiemancul che setime, Nonio, il nestri peteçon Alessio, cence mai rivâ sul podi, al à puartât vie il sest puest e la Sartore_Muspilli, cuarte, e podarà svantâsi par simpri di vêi robât il puest par une grampe di ponts a Torototele_Floramo.

O pûr, menzions di merit no si puedin dineâ a mus come Fulvio_Nevio_Romanin, rivât inte top ten, o come a Zorç Cesarat Matungo, il mus argjentin plui adalt di ducj, cuntun biel 13im puest. O ancjemò, grande prestazion di Pierina Stele Alpine Gallina, che cumò e scrîf sedi par talian, sedi par furlan.

E ae fin cemût no dì dî alc dai prins trê, Serena Teresine la çuete Fogolini, Massim Brene Sfolmenade Furlani e Stiefin Catine la Nere Morat, che a àn fat une corse une vore competitive e simpri a nivei altonons… Ve ca cualchi fotografie des premiazions…

E dopo o vin scugnût taiâ alc, come l’intervent di Ticât dai Mus, che però o podês scoltâ su OndeFurlane e che us disvele dute la classifiche. O vin taiât lis leturis pal secont e tierç mus, ma o scugnivin lassâ un pôc di spazi a LA GNOVE PLUI GRANDE DI DUTE LA SERADE, ven a stâi la publicazion dal nestri secont libri de Osterie! Cul titul di “Tu scrivarâs une conte” e il sottitul CorseCurte24 al è il secont volum de golaine Corsecurte e chest colp, stant che no jere une idee nassude al improvîs, al è pardabon vignût fûr ben. (Cuvierte dal Muini Stiefin Stefanut, editing di Carli Pup e dal Ostîr) 77 contis sielzudis di 27 autôrs, comedadis e dutis di gjoldi

Vait in Amazonie E COMPRAITLU, che al è bielonon! o domandait al Ostîr che o cumbinin.

Avonde? Nuuu Al sarès di fevelâ des Ontecurtutis, sparniçadis ator pe int tant che une droghe (Saveviso nomo che il mangjâ preferît dai mus al è il… Mussli!). E podìn contâ dai premis, stant che i mus che a son rivâts dal 15 al 1 puest a àn vût ducj un premi, che pe plui part a jerin libris e çapins/cussins/siarpis/borsis di lane fatis de mari dal Ostîr, e tigneitlis cont che a son lis ultimis. A cualchidun plui fortunât al pues sei rivât alc altri, ma i tignin a tornâ a dî che l’important al jere jessi part di chest laboratori di scriture narative par furlan che al è durât un an e che al à par dabon metût adun un “stât de narative curte par furlan in dì di vuê”.

O vin fevelât ancje masse, e o sierìn achì. O vin di ringraciâ chei de Zurie, che a àn lavorât un an di rive jù par che il progjet al saltedi fûr ben. La gjatemarangule Giorgia che ancje se no à vinçût il Fantacorsecurte, freade di Muspilli, (che e à vude la cene sore nuie e un super cussin pe cjase gnove), e à dât une biele man a meti adun la serade. E o vin di disi graciis a chei di Pituel par vê metût dongje une cene pardabon furlane, cun dentri un biel pôc di bon acet. E in gjenerâl a ducj chei che a jerin e nus àn sostignût comprant il libri (oh, dome 10 euros eh) Dal sigûr o smenteìn cualchidun, ma o vês i coments par dî la vuestre e zontâ alc. Intant noaltris us lassìn lis fotografiis che a vanzin, dutis bielis (graciis Muini).