CC24Dicembar#02 – Murî

#02 – Murî

E cuan’ che tu sarâs za muart, ma muart
chês tantis voltis dentri une vite
ch’a si à di murî, alore slargje ben i tiei voi
a la cjavece dal sium

La prime volte che soi muarte o vevi sedis agns.
Lu sai. Lu sai ben ce che o pensais cuant che une e dîs une frase cussì. Ti ajal lassât il morosut? Âstu barufât cuntune amie? Si sono separâts i tiei? Ce altre stupidagjine ti ajal fat murî? Ma chestis a son coionadis, par me, e voaltris che lis pensais o sês dai coions. E scusait se us dîs lis robis cence tamês fra i dincj.
Soi muarte a sedis agns sot dal torpedone, cussì si clamave ta chê volte. Agns ancje chei plens di coions, che a vevin pôre a dîsi Pullman e alore si inventavin peraulis. Cingomma, limetta, arzente o bevanda arlecchina, juste par dîus chês che mi visi. Ma no vuei pierdimi vie, come simpri. O ai un caratar svoladi, al è facil discjolimi e viodimi scjampâ. Ma us stavi contant dal torpedone. Al puartave a vore i operaris. In fabriche.
Mi è passât parsore tant che o fos un fertaie.
Gome denant e gome daûr.
E soi muarte.
Ma dopo o jeri inmò ca, vive e pronte.
Dopo trop? No sai.
Pronte par ce?
Pronte par murî une seconde volte. Cheste volte in vuere, come tancj, ma no stêt a domandâmi dulà, o cemût di precîs.
Cuant che si mûr, o almancul, cuant che jo, o mûr, no mi visi masse dal moment de muart. Mi visi dome che soi muarte. Però mi visi ben la vite di prin, e o torni a tacâ di li. No subit. Mi covente un pôc di timp, stant che par lustrâ la cjuce, dopo che o mûr, mi va vie un pôc. Ma o torni. Simpri. Mi clamin. Mi vegnin a cirî. O soi une che e lasse simpri un bon ricuart, o crôt, se no no si spiegarès. Ancje se mi capite da râr di jessi preseade, cuant che o soi vive. Po bon, no pues jessi sigure nancje che a vain cuant che soi muarte, stant che soi muarte. Dut câs, achì o jerin restâts. Ae muart. O miôr, lis muarts. Lis mês. Des primis us ai dit, ma no pues fâ un elenc precîs, fra lis vueris, di fat, soi muarte une vore di voltis.
E po dopo, o sai di sei muarte sot dal pantan, a Frasegn; intal Cottolengo di Torin, dopo une colade jù pe grande scjalinade, sburtade di no sai cui. Soi muarte pacade e sierade in cjase, vaint parsore dal jet, cui fîs te stanzie dongje. E une volte a vore, une altre intun negozi, une altre ancjemò scjafoiade cul gâs, o foropade di fusiladis, schene al mûr, o svolade di un barcon, intune cuesture. No lis conti, lis voltis che soi muarte, nol covente. O ai capît che no rivarai mai a contâ la ultime.
Mi soi domandade se e je colpe mê, se al è par cemût che mi compuarti, cemût che o trati la int, cemût che o intint la vite… pues stâi. O pûr, mi è capitât di pensâ, in chestis ultimis voltis, muarte scjafoiade di diviets e decoro e egoism e ignorance, che e je dome colpe dal non che o puarti.
Mi clami Libertât. Biele, armoniche, limpie… ma une vore, une vore delicade.

di Pieri Moràs (Atile)
#1819