CC24Novembar#14 – In daûr

#14 – In daûr

Cori. Cumò nol reste che cori.
Pontâ une direzion e vie, scjampâ a rote di cuel. Cheste e je le ande di chei che come me a son costrets di simpri a vivi in vuaite. Tu lu capissis a pene nassût che al funzione cussì. E tu sâs ancjetant a colp che lis robis no gambiaran. O sin nô e a son lȏr. E lȏr e àn chê di fânus fûr.
Il nestri destin nol varès di sei chest, ma… tant al è.
Nô o volaressin dome sghindâ lis rognis e vivi la nestre vite in pâs. No je te nestre nature lâ cuintri di nissun. Dutcâs nus cirin e nul lampin, nus train.
Dal gno trop jo o soi il plui piçul. L’ultim nassût, il plui inespert e il plui a risi.
Di chestis bandis tu scuegnis imparâ a la svelte a lei i segnâi. E il segnâl al è stât che cuant che chei altris a àn sintût alc e a àn tacât a cori e jo vie daprûf, fin dentri dal bosc.
Dome che jessint il plui piçul, o soi ancje il plui lent. E cumò o soi restât in daûr.
Rivât denant di un cret o svolti a man drete e subit daspò mi inacuarç che chei altris a son lâts di chê altre bande. O soi di bessôl.
Mi cjali ator e mi buti dentri di un ingredei di frascjis e baraçs. Miôr sgrifignât che muart.
Sito. Fer. Orelis spiçadis.
Veiu. Son simpri plui dongje. Ancje se si movin ben planc ju sint.
Di chei omps o sai cetant pôc, ma al baste e al vanze. Pericul e muart!
Sclopis in man, musis tristis.
Lant daûr dal gno istint che mi dîs di no movimi, o resti imobil, come incantesemât.
No podevino pontâ chei plui vecjos di me? Varès di jessi cheste la leç naturâl, no mo?
I vecjos a muerin e i zovins a vivin.
Ma achì nol funzione cussì! Chel che al reste in daûr si tacone. Tant plui se al è masse zovin par savê cemût gjavâsi des rognis.
O sint i lôr pas a cualchi metri.
Il cûr al bat cussì di presse e cussì a fuart che o ai pôre che a rivin adore a sintîlu.
Son chi.
Ma parcè cussi tante tristerie? Parcè nô? Parcè propit jo?
Domandis masse profondis.
Une ricercje di sens par cjatâ une reson ae crudeltât umane masse complicade cuant che tu sês un zovin cjavrûl.

di No Ancjemò
#1808