Il porco su la gridele

Pieri nol è un bon cristian, inutil.
Se si met dongje bevi, fumâ, mangjâ masse, inrabiâsi, vê sflacje e… bon, vie discorint, i vizis, a par chel des feminis, ju à cuasi ducj.
Ma soredut di un nol rive a parâsi: lis blestemis!
E cuant che i rive la gnove che il gnûf predi di Pletefruçade al è 1) zovin 2) neri 3) une vore moderni e inovatîf, ma soredut 4) une vore fiscâl tal pesâ i pecjâts e dâ lis pinitincis… bon, al è za che si caghe in man pe confession di Nadâl, che al scuen fâle si no la femine lu lasse fûr dal cenon. E cun di plui nol à nancje di vê cumbinadis masse, si no la femine e ven a savêlu e i tocje sì vignî al cenon, ma parâ jù dut cu la aghe o al miôr cu la coca cola.
In sumis, tante e je la sbigule, che al decît di lâ a cjatâ il predi cualchi dì prin, in canoniche, par capî cemût che al pues sghindâ la scopule, magari cjatâ un acuardi o almancul preparâsi a la Apocalìs.
Al sune e al ven fûr propit lui.
«Bundì… che mi dîsi?»
Eh… Eh bon, neri al è propit neri, nuie ce dî, ma… «Cemût che al cjacarial furlan, siôr Plevan?» i fâs Pieri.
«O podarès fâi la stesse domande» si sint rispuindi, «Ma che mi disi daurman che o soi daûr a preparâ il copion pe messe di Nadâl…»
Ussignorut, al pense puar Pieri, adiriture il copion, o soi dal gjat, e cussì i espon subit la cuistion. Fûr il dint…
«Ah, bon bon, o capìs la situazion. Ma… tantis tantis? Se o vessin di cuantificâ, plui o mancul di cinc in dì?»
«Eh po! Nol è che lis contis ma… di plui di plui!», i fâs Pieri, che nol veve coragjo di ameti che altri che cinc, ancje plui di cincuante!
«Ah, la situazion e podarès jessi grave, ma nuie pôre. Come che al varà sintût o ai dai metodis modernis… Par il pecjât dal blestemâ si à di doprâ la gridele!»
E prime che Pieri al si pierdès a pensâ se di cueste, luianie o ce dal diaul (porconant in tal cjâf, clare) chel altri lu clame dongje dal ordenadôr, al vierç un file di excel e al tache a spiegâi.
«Viodistu. Su lis riis a son i pecjâts, su lis colonis il coeficient. Ún boie, par esempli, al è pôc grâf in ciertis situazions. Al pese 0,4, ma ce saio, se tu lu dopris par indicâ une biele frute – merit dal Signôr – che e passe par strade, al pese dome par 0,2, stant che al sostituis une espression di maravee e gradiment».
Pieri lu cjale dut sturnît.
«O pûr une blesteme peade al lavôr, clare, e vâl di mancul… Un vacje par un contadin, par esempli, a pese par 0,3. Invezit chês par talian, plui costruidis, ce saio, su lis bestie inconsuete, o feroci, o sui molluschi, e je, disin cussì, de categorie des blestemis gourmet, e ti ven a pesâ 0,8 o 0,9»
«E un porco normâl, siôr plevan?» a domande Pieri, che un tic al tacave a capî.
«Eh, li al dipent ancje se al ven prime o dopo dal divin. Dut câs, no si scjampe, il coeficient al è simpri, al mancul, 1».
«E ma dio p…» i scjampe a Pieri. E alore ve li. Prime penalitât.
«Eh mi displâs, ma cumò cheste nus tocje za inserile. Però le metìn intal sfuei des blestemis incompletis, che a mostrin une cierte dose di pintiment», al dîs il predi, e dopo vê digjitât alc. «Ve ca, pesade par 0,7. Di prionte tu sês ancjemò dentri dal bonus».
«Il bonus?»
«Eh, sì, come tal basket, in pratiche. Seguissistu la palacanestro?» e disint cussì, il plevan si jeve de cjadree e al è alt… aaaalt… e al somee dut a
«Diu… Lebron!» i scjampe a Pieri, intant che si svee di soresalt.
«E cheste di dulà le âstu tirade fûr! Jal dîs ben al plevan jo ve!» i berghele la femine, scaturide e cui bigudins, intant che a sunin lis cjampanis de messe piçule.

di Pieri Moràs
#1754

1 comment