Contis & Cjantis & Gnovis

Cjalait ca, stant che o sin intune Ostarie, al è just ogni tant peteçâ cui clients, e contâ lis gnovis, sedino di contis, sedino di cjantis, sâstu mai che i coventin a cualchidun.

La prime gnove e je che se o sês dai lavatîfs, che non vês fat in timp a partecipâ a Vôs de Basse, il concors par contis curtis inmaneât dai Comuns di Cjarlins, Muzane, Porpêt, San Zorz, Prissinins, Gonars e dal sigûr cualchi altri che si smentein, nuie pôre! O vês la possibilitât di mandâ la vuestre conte fin a novembar, stant che il concors al è stât prorogât. Se invezit o sês di chei che a partecipin ae nestre CorseCurte24 e une conte al mês us pâr pôc, e us plasarès scrivi di plui, bon… tant par scomençâ vergognais, stant che noaltris o publichin ancje altris contis, in bande de corsecurte… Ma cuant che o vês finît di vergnognâsi, ben po, ve ca la ocasion juste par scrivi une conte. Cun di plui, us visin che il concors al è viert ancje pes poesiis e par lis traduzions… Ce voleso di plui? Ah… clare. La nestre Coghe Fuguline e je daûr come simpri a lavorâ par cheste iniziative e come che o disin simpri, l’important al è jessi, e no covente vinci, inutil dî che si ten di cont la lenghe e la sô leterature curte, cuant che dopo no si à nancje timp di fâ viodi che lis iniziativis di leterature curte in lenghe no si lis caghe.

Simpri su chest troi o vin un altri apontament di no pierdi. Come che o savês, il teme pe CorseCurte di Setembar al jere un teme di cjançons, e lis contis che o stês leint in chescj dîs achì sul sît a son ispiradis a cjantis furlanis, plui o mancul famosis. L’Ostîr, che un pôc al stâ daûr ae robe, us à ficjât dentri ancje une vore di cjantants e grops furlan di cumò, di Massimo Silverio ai Laipnessless, des Urtie (de nestre Massarie e Cjantore) a Alvise Nodale, dai Bakan ai Dissociative TV… insome, dute int che o podês lâ a scoltâ su spotify, su youtube, ma soredut, cuant che a sunin ator di ca e di là, lâ a sintî. Cumò che o vin scuviert che scoltâ i conciert us slungje la vite (ma nol coventave un studi) podês ben viodi di stai sot ae musiche di chenti e magari ancje a chê mancul innomenade e in lenghis minoritariis. E di dulà tacâ se no di Suns, la manifestazion musicâl che no à dibisugne di nissune presentazion. O cjatais dut ce che us covente su SUNS EUROPE a chi sul sît. Ma par fâle curte, viodêt di cjoli daurman i biliets pe seradone intal teatron ai 19 di Otubar. 

E ultime, propit cjacarant di int spanade e musiche, îr di sere e je stade la presentazion dal gnûf disc dai LAIPNESSLESS, cun dentri ancje i revocs a lis contis de vôs dal Citos, e il disc al è fûr dapardut (okay, la peraule ‘dapardut’ o podês ancje gjavâle) e insome… Prime robe, vait a scoltâlu! Seconde robe, se us capite, vait a sintîju e comprait il disc in vinîl par sostignî chescj trê disgraciâts e ducj i lôr coparis di mirindis.

E avonde gnovis di cjantis e contis par vuê. Tornìn in spiete dai mus!