CC24Avost#20 – Promessis

#20 – Promessis

Ti promet un amôr clâr e sclet par simpri. No rivi a imagjinâ une robe plui biele, e no mi fâs pôre prometital par dute la vite.
Pardabon?
Sì. Tu sês la persone de mê vite, o ai voie di stâ cun te simpri, che tu stedis ben o mâl, che tu deventis siore o che tu restis avonde puare come cumò.
Cheste ultime robe no je romantiche!
E je vere, però! Se pensi cumò a la robe plui impuartante par me… beh, chê robe lì al è il nestri rapuart.
Iih, ma pardabon?
Sì. E se podès lu scrivarès tal cîl cuntune pene zigante, che cussì ducj lu leiaressin.
Ma sâstu che in aziende o vin metût sul marcjât une robe dal gjenar di pôc? No je propite une pene, ma il concet al è chel, tu rivis a scrivi messaçs tal cîl.
Pardabon?
Sì. E se tu vûs ta la vent par 850 euros, si clame DeepSky e e funzione cuntun propulsôr no masse grant, portatil, che ti permet di “scrivi” par aiar sbarant cheste vernîs speciâl, fate dipueste, ancje a 100 metris di altece.
Pardabon?
Sì. DeepSky al è pensât soredut pes aziendis che a intindin fâsi publicitât tes citâts balneârs, parcè che tu âs bisugne che e sedi une grande concentrazion di personis intun unic puest, come in splaze par esempli, e che la int e vedi pôc di fâ. Il messaç cun di fat al reste alì par pôcs minûts e dopo si sfante, ma intant al è une vore senografic.
Eh sì, mi imagjini!
Ti interessie alore?
Bon, sì… Lu disevi plui par dâi fuarce al concet, ma insome se ti fâs plasê ta lu compri.
Benon, paistu cun bonific o cemût?
Mah, 850 euros in contants no ju ai…
Alore ti doi l’IBAN. Vierç la app dal Home banking che ti judi jo.

. ..

Si sveà sudât, tal cjalt de gnot estive. Jê e durmive trancuile, cu la bocje vierte e i cjavei ancjemò un pôc bagnâts. E rivave a jessi biele distès. Ce vencul… Promessis di amôr che a deventin ocasion par fâ casse!

Amôr, sêstu sveade?
Mh?
Sâstu che ti vuei tant ben?
Sì, ma cumò lassimi durmî.
Tu mi vuelistu ben?
Tu sês la robe plui impuartante de mê vite.
Pardabon?
Sì. Buinegnot, che doman mi svei adore!
Buinegnot amôr.

di Margarite Cogôi (Glorious Grene)
#1735