CC24Avost#13 – Il niçul

#13 – Il niçul

Il mont al baline. Prime in sù, daspò in jù. Tu cjalis il cîl, e po dopo la tiere. L’alt e il bas. Un lamp i nûi. E lis rosis sul prât. Une cisile che e svuale. Il profîl di un clap. Il soreli su la muse, il muscli che si inrimpine su di une lidrîs. E ancjemò la spice dal cjampanili e il polvar de place. Lusôr e scûr. Sperance e disperazion. Svual e colade. Amôr e muart. In chei moments ti ven fat di pensâ che cheste e sedi la plui vere rapresentazion de vite umane. Un moviment variabil, che nol cjate mai pâs. Al criçule il ramaç, il pindul al segne il timp in ossilazion simpri plui piçule, strente. Cuant mai si fermarà? Tu ti domandis. Sigurementri in curt. Ma no ancjemò. E stant cussì, in posizion precarie e variabile, dute la storie dal to vivi ti passe sot des ceis. Ancjemò un colp in sù: la prime bussade. Un colp in jù: la prime bausie. Criçul, craçul. Il curtìs e il sanc. Craçul, criçul. Il berli mut e il scjampâ. Ma indulà? Dut di bant. Parcè che chei come me e come te ae fin ju cjapin simpri. O forsit si fasin cjapâ, cuant che la fadie dal vivi e devente dure di gloti tant che tu speris di finîle. Ancje cumò, se al fos pussibil. Parcè che di lâ in sù e in jù tu ‘nd âs avonde. E intant al tache a mancjâti il flât. Il grop che ti àn strent sul cuel ti scjafoie. La cuarde. I pîts. In dute chê gjostre tu âs pierdût un çucul. Ma tant no ti coventarà plui. Sot da l’arbul dai picjâts, usgnot, lis striis a vignaran a cirî lidrîs di Mandragore par fâ filtris di amôr.

di Angelo  Floramo (Torototele)
#1728

1 comment