Meni, il vigjil e…

Meni Daltai, si clamave pardabon cussì, i plaseve la compagnie. Al jere a stâ  Vuarzenon di Stalis a pôcs chilometris da ostarie ‘Al caratel’ e abitualmentri si cjatave cui amîs e cualchi ‘new entry’ a contasile e fâ cuatri ridadis di gust ator da taule. Ma si sa cuant che si cjatisi in public cemût che e va a finîle. Un zîr di taiuts ordenâts di Gjigji, dopo i tocje a Gjino Raviz, e Checo che no al vûl jessi di mancul e vie indilunc; si capìs che dopo 6, 7 zîrs di taiuts, ancje se judâts di un pôc di mangjative, no si podeve pretindi che Meni si movès a plomp.
Finide la partide di discors al rivave simpri a movisi dignitosementri viers de machine, montâ sù e cjapâ la strade di cjase.
Cheste volte i ven la idee di cjapâ une strade alternative parcè al veve savût ce al varès sghindât un fastidiôs semaforo. Dopo un biel toc di strade, cuant che al viôt il cjampanili, la sorprese: une palete a sponte dal scûr; si capìs dal moviment che bisugnave fermâsi.
Al sbasse il fignestrin e il vigjil: «Signor Daltai (lu cognosseve…) favorisca la patente!»
Une voglade svelte e «Dut a puest». Meni al ritire la patente ma, disgraziatamentri, cun la bocje spalancade e in direzion dal vigjil al sborfe un ajar di stomit che al vigjil nol pôl fa fente di nuie: «…avverto un alito pesante e devo sottoporlo al test dell’etilometro…».
A Meni, ancje se al veve capît etolitro invezit che etilometro, i son vignûts i sgrisui parcè al saveve di jessi in fal; nol veve bevût un etolitro di vin ma plui di un litro sì; al tente une difese estreme: «Ma siôr vigjil o soi a sta a nancje un chilometri e ‘giuro che mi sono limitato a bere due sprizzetti’ e…»; e la tirave tant pa lungje che il vigjil stufât di chê lagne: «E va bene Domenico Daltai per questa volta la lascio andare».
Dut content Meni al met la prime, la seconde, la tierce, la cuarte e vie dal scjampât pericul di corse. Ma cun so maravee no si viôt di gnûf la palete e il stess vigjil che lu oblee a fermasi: «Signor Daltai – cun vôs alterade – non le avevo detto di rientrare a casa?», e Meni «Mah, mah … veramente non so … giuro che non sono rientrato in osteria».
Un mot da cjâf dal vigjil e Meni al capis di bot e vie cun la prime, la seconde, la tierce, la cuarte e vie di gnûf dal scjampât pericul. Ma dopo un pôc di timp, plui o mancul come prime no ti viôt di gnûf la palete, il vigjil e … «Meni (e ju une croste) no stâ a cjapâmi pal cûl cuntun cuart passaç parcè no ti le perdoni … cjale ben il cjampanili, e une buine volte … esci dalla rotatoria!»

di Laurinç d’Antognan
#1667

1 comment