CC24Fevrâr#26 – L’arbul di zessalmin

#26 – L´arbul di zessalmin

O jeri sentade tal curtîl de mê cjase gnove, intune citât che no jere la mê. O sieri i voi e o viôt chel arbul di zessalmin che al decorave il curtîl de cjase de mê infanzie. Al é straordinari, i agns a passin e o ricuardi chestis robis piçulis: cumò che o soi lontane e je la prime robe che o pensi. Mi pensi sentade te ombrene di chel arbul che al veve flôrs blancs, che mi cjapin par il lôr fuart balsim, che mi puartin a cuant che o jeri une frute e no mi plasevi, parcè che mê none e taiave un toc di zessalmin par puartâlu a gno nono, che al jere tal cimitieri, alore, o metevi simpri dongje chest odôr cun la sô muse avilide cuant che e viodeve il so inamorât. Cumò che ancje a mi mi tocje pierdi cetantis robis, che lis mês spietis ae vite a son diviersis di ce che o crodevi,  chest odôr mi abrace tant che un gaban inte nêf. Tal crudêl Invier dal gno cûr, chescj ricuards a son flamis che a scjaldin.
Dut câs, o torni simpri cun il cjâf ae cjase de mê infanzie e mi senti sot di chest arbul che al somee un cjamp di nêf e cualchi flôr piçulut al cole tant che un floc di nêf parsore de mê muse e o viôt tal cîl blu, chest blu slusorôs intun dî di Istât, e di front e je la mê cjase vecje, ma ancjemò braurose e in pîts daspó di cinc gjeneraziôns.
Daurman, tal desert che e je la solitudin dal jessi lontans, a mi vegnin tal cjâf i detais dal gno passât. La cjase, lis musis de mê famee che a ridin, dutis chestis robis cence impuartance, ma che a son la mê compagnie, in chescj timps di aviliment.

di Cecilia Liva (La Ciachegna)
#1563

1 comment