CC24Fevrâr#17 – Alì

#17 – Alì

E dopo alì, distirât incatramât cuntuart ta chel ciment bagnât, jo alì cul smursiel inlaipât e sglonf, intant che in bocje si slargje un calôr dolç che al gote lent. E il voli ofegât a tac di tiere che al nase chei scarpons che ancjemò a talpignin tor ator, cumò smolâts, cumò cuiets. Jo alì a un respîr di chei sgarpions, di chei cingolâts pontâl di fier, di chês rincjinis cromadis che o ài ancjemò l’indret di intivâ intun dissen, intun colôr e savêju biei.
E dopo alì, sintint chês vôs che no son plui il vuacâ dal lôf ma spongje e spagnûi che a bughin tabaiant in crôs di un complean, di une partide, di un lunis che al à di rivâ tal indoman. E di une frute, tabaiâ, che cualchidun le veve cognossude davant di cualchi scuele, di cualchi pub, di cualchi bûs e che no je come chês che si cjatin tant par tant, ma sante, ninine, une biele galandine.
E dopo alì jo, intant che il mâl al comence a sflorî tes cuestis, te schene, tai braçs discubiâts. Alì intant che pance e cjâf a tuchin dûr e une magle clipe si slargje sot a mut. Jo alì, rivât a jessi un non spudât, un toc di cjar, di materie ferme e cence lûs, jo alì intant che o provi a sgarfâ e preâ un sôl parcè.
E dopo alì, cuant che ju sint montâ e la machine cidine sbrissâ vie. Alì, ta chel vueit che al è restât, cuntune sclese di voli o viôt chei bârs di jerbe blancje tes crevaduris dal ciment e o capìs che e je zulugne. Zulugne tal soreli che si jeve.

di Stiefin Morat (Catine la Nere)
#1554

1 comment