La Croniche de… Gruesse Sorprese!

Ben po, a saressin cetantis robis di dî che no rivarin a fâ une croniche che lis contis dutis, ma cirìn almancul di strucâ lis robis par che cui che nol è podût vignî al vedi une idee di ce che al è sucedût.

O vin tacât cul pac in biele mostre, cun floc plen di omenuts che a corin e cjarte plene di mus colorâts, metût adun de nestre gjatemarangule, simpri al top pes senografiis e lis ideis. E o vin tacât daurman cun il nestri Muini che al à let il teme dal mês di Zenâr, plen di sbilf e aganis e orcui e fadis e diaul e insome… o vês ben capît.

E daspò di lì al à fat dut l’Ostîr, che par une volte no si jere preparât un tubo di nuie, al à dit, e al à clamât sul palc, tal ordin, il so fidât famei Tapioca City, Checo Tam, a lei Il Tai, e judicâ lis sôs performancs de CorseCurte22.

E une mieze sorprese le vin fate clamant in Argjentine Noemi e Eduart (Passarute e Acuari Cence Branchis) che nus àn seguît vie direte facebook insieme a Scalembrut, Vecjo Claes e Argo Patùs… e tancj altris amiis di là de aghe grande.

Alessandro Valoppi. che nus à let No respiri, tirant fûr, ae letare, il finâl de sachete, stant che te copie dal Ostîr cuissà dulà che al jere lât a finîle, e cun di plui, puar Real Cocâl, al à scugnût sopuartâ il “conteshaming” dal ostîr, che lu acusave di no jessisi ancjemò iscrit ae CorseCurte24.

E di li e je rivade la ore dal Lupusinfabula, che al à conseât di lâ a lei la conte vincidore di Setembar, che no si visave cuale che e jere, ma che e jere biele, e al à vût il plasê di fânus scoltâ par vôs dal Berlon la sô conte Il pestel. Berlon che al rispuindût ancje a une domande marilampade, stant che al jere ancje lui un concorint, il Sporting Brugnul.

Ma la robe e je lade indenant super svelte, stant che la prime sorprese de serade le à presentade l’Ostîr insiemi cun il Peteçon, Alessio, in nestri social media manager di Instagram. O vin inventât lis OnteCurtutis, contis che ti restin intor tant che una magle di vueli, e us baste lâ su Instagram par cjatâlis. (ma a rivaran ancje su facebook, dai). E dopo 10 OnteCurtutis, che a parin vê vût un grant sucès intal public. (Si pissavin di ridi) ve che e jere rivade la volte dal Atletic Gjatui, cuarte classificade ae CorseCurte22, che nus à let la Cjase de Lontanance, une conte bielone e poetiche, scrite di Astrid.

Finide? Ma ce! Al è rivât ancje il Volketitrai-Liga, indisponente come il non che e puartave, che nus à let Bundì, une conte fûr cu la cassele degne de nestre massarie. Ma mai fûr come al conte Pasche di bondance e ligrie dal Borussia Dordul, aka, Rudy Citòs, ancje lui ogjet di conte shaming, che nus à fat ridi e sgrisulâ intal stes timp.

E pûr trop la vincidere, la nestre Coghe Cjicechepicjedispicjelacite, no podeve jessi presinte, ma il Berlon al à let la conte “Catans intal cûr“, che nus à ben spiegât parcè che e à vinçût.

E tal mieç al è stât il timp ancje par intervistâ i doi zurâts de Ostarie, il Sclapeçocs Carli Pup e il Mestri Zuanluche Franco (e jù conteshaming) che a àn fat confessions incredibilis. E altris confessions al à fatis l’Ostîr, che si è intervistât di bessôl e al à pandût doi spoiler su la CorseCurte23.

Tant par scomençâ il limit pes contis al torne a 2000 batudis, come te corsecurte passade. Al sarà però dât un bonus di trê ponts a cui che al sta sot des 1500 batudis. Il secont spoiler al è stât chel di zontâ un bonus “Cambie” in plui, se par câs no us plâs il teme. A deventin cussì trê. Ma ultin, ve che al è stât disvelât il teme, o miôr, i temis che a saran dâts par il mês di Fevrâr (che no son Pieri si volte, eh)

A leile cussì us pâr curte, ma a jerin rivadis lis 18.15, ore proviodude par la vierzidure de Gruesse Sorprese. Al è stât però il timp par disvelâ altris dôs, di sorpresis: che al jere pene stât il complean di Contecurte e a vevin une supertorte di gjoldi, e che a vevin sul sît passe 1500 contis, in cuindis agns, cuntune medie di 100 contis adan… Robononis!

Vonde, va. Ancje masse. O cjapìn la ocasion di ringraciâ pardabon ducj chei che a son vignûts ca a cheste serade e ancje ae cene di dopo. In bande di chei za citâts, o vevin ancje Rosute Pelote, Il Fi di Marie dal Cafê e altris concorints de corsecurte di cumò, che a son vignûts a curiosâ e scuvierzi i trucs. Pobon… vonde.

La sorprese le savês za e no covente dîle. E je stade parfin regalade a ducj i presints che a jerin dentri tal libri o che a àn judât a meti inpins il spetacul. L’Ostîr al è deventât puar, ma al à dit che nol à voie di murî siôr e al è content cussì. E un graciis finâl, ma lu vês za let e viodût a ca, a Sara e Ivan dal Spaccio Raffl, che nus àn ospitât e ufiert la super torte.

A la prossime gruesse sorprese e indevant cu la CorseCurte24! Doman al è l’ultin dal mês!

1 comment