Bon Complean Contecurte!

Sabide di sere, ancje se o vevin di disvelâ la GRUESSE SORPRESE, o vevin une vore di altris sopresis plui piçulis, che ae fin, ancje se pûr trop si sin un tic inglaçâts, nus àn scjaldât istès.

La plui biele e maraveose, di gale, e je stade chê de SUPER TORTE che Sara, dal Spaccio Raffl, nus à regalât par fâ fieste par il nestri complean. Cemût cuâl complean? Ma chel di Contecurte!!!

Ai 16 di Zenâr dal 2009 e saltavin fûr lis primis dôs contis curtis, Ploie e Laipod, di Dree Venier e dal nestri Ostîr. Ta chê volte o jerin un blog, su Splinder, e ancje se coments e cualchi fufigne e je stade pierdude par strade, o sin lâts indevant a puartâsi daûr dutis lis nestris contis, prin su Blogspot, e po, come cumò, su WordPress, cun chel che forsit al è un dai pôcs e forsit l’unic sît che fat sù dut par furlan ancje intes fondis, par noaltris che lu inzornìn. In sumis… o sin rivâts a puartâ fûr adiriture 15 AGNS DI OSTARIE! E nus pâr che al sedi stât un bon motîf par fâ fieste.

Eh… si, o sês vielis, se nus cognossevis bielzà di chês primis contis.

E une altre piçule sorprese che o vin spiât sabide e je stade chê di jessi rivâts a contâ dutis lis contis curtis che o vin sul sît, al net di contecurtutis, contis cence cjâf, contis misteriosis e dai Ecuméne. Ben po… O vin plui di 1500 CONTIS. La ultime, jessude vuê matine, e je la numar 1533.

E stant che inte pagjine dulà che a son metudis in liste dutis lis contis no sin rivâts ancjemò adun, us lassin chi, par i plui curiôs, il numar di contis an par an.

• 2009: 95 contis
• 2010: 56 contis
• 2011: 48 contis
• 2012: 61 contis
• 2013: 65 contis
• 2014: 84 contis
• 2015: 110 contis
• 2016: 129 contis
• 2017: 63 contis
• 2018: 64 contis
• 2019: 130 contis
• 2020: 150 contis
• 2021: 94 contis
• 2022: 300 contis
• 2023: 56 contis
• 2024: viodìn se o rivìn a bati il record dal 2022!

Insome… un motîf in plui par iscrivisi ae CorseCurte24 – Tu scrivarâs une conte. Ancje parcè che o sin rivâts a 31 iscrits e ancje se o savìn che no ducj a rivaràn a tignî bot dut l’an, la aventure si presente maraveose.

E cun di plui, cumò che o vin ancje un obietîf par scrivi bielis contis, ven a stâi chel di rivâ a proponi un nivel cualitatîf che al justifiche la nassude di une publicazion, la robe e je pardabon alc di no pierdi, sedi par chei che a scrivin, sedi par chei che a àn gust dome di lei. 

Benon… nus pâr che daspò di 15 agns di Ostarie e un libri scrit di ducj ma a non Serafini-Fogolini, la jessude dal prin libri di narative curte par furlan a firme di un coletîf al sedi pardabon une biele maniere di festegjâ l’inovâl!

E di vuê lu podês cjatâ ancje a Sclaunic, in place, li de mercerie-tabachin Gomba, e a Gjalarian, framieç di pomis e di ducj i libris dal Ostîr, li dal Spaccio Raffl.

Dîs euros pardabon ben spindûts! Fidaisi.