CorseCurte24 – Il regolament

CorseCurte24: Il regolament

PREMESSE: un regolament al à di proviodi dutis lis regulis, ma podês ancje fâ di mancul di leilu e iscrivisi e vonde, cence pierdi timp. E dopo preparâsi a scrivi…

O pûr us vin preparât achì: CorseCurte24 – regolament in struc, un pdf di podê scjamâ, une vore sclet e veloç, bon ancje par mandâlu a cualchidun che o volês tirâ dentri inte competizion.

LIS SCJADENCIS
Cul prin di Zenâr e cussì ogni prin dal mês, par dut il 2024, a ogni iscrit ae CorseCurte24 al vignarà dât un teme che al scomence cun “Tu scrivarâs une conte…“
Si à timp dut il mês par scrivi la conte e mandâle.
Dentri dal 15 dal mês dopo, la zurie e votarà lis contis e il public al podarà zuiâ al FantaCorseCurte24 votant la conte che al à miôr.
Ai 16 a vignaran publicadis lis classifichis.

LIS CONTIS
Lis contis a àn di jessi “lungjis” al massim 2000caratars, spazis comprendûts. Ma no son tancj fastidis se a son plui lungjis (cjaparan cualchi penalitât), o se a son fûr teme (si rangjaran lis zuriis).

Lis contis a son simpri anonimis, o miôr, si discuvierzarà il non di gare di cui che lis à scritis dome dopo la publicazion des classifichis. La identitât dai autôrs si savarà intal 2025.
A vignaràn publicadis sul sît man a man che a rivin, e si aciete ancje che a vegnin dopradis intai spetacui e intes publicazions di Contecurte, ma si pues tirâlis vie in ogni moment.

PAR PARTECIPÂ
Al baste mandâ une mail a contecurte@gmail.com e sielzi un non di gare. Dome l’Ostîr al savarà cui che o sês. A puedin partecipâ ducj, e no covente jessi scritôrs o savê scrivi ben par furlan, che l’Ostîr al pues dâ une man su la grafie. Al baste vê gust di provâ a scrivi e gole di fâ alc di biel e creatîf. E vê storiis di contâ.

IL NON DI GARE
Si à di scugnî sielzi un non di gare e ancje se i concorints, par evidente declinazion furlane, a son daûr a fâ une corse di mus, il non al è a teme “Corsis di cjavâi“. Podês sielzi cualsisei non des corsis de SNAI in dì di vuê, o di cualchi cjaval (o mus) innomenâts o di une volte, o miôr ancjemò inventâlu voaltris. Baste che nol vedi riferiments ae vuestre identitât. Gjoldeit!

LIS ZURIIS
I ponts a vignaran assegnâts di une zurie tecniche componude di Rafaêl Serafin (l’Ostîr), Carli Pup, Donato Toffoli e (si viodarà).
In bande e je ancje une zurie popolâr che e zuie al FantaCorseCurte24 cuntun coment firmât dulà che e indiche la conte che i plâs di plui (o chê che e riten e sedi la miôr par scometi). Ancje intal FantaCorseCurte si pues doprâ un non di gare e i concorints a son i benvignûts se a àn voie di scometi su lis contis dai aversaris. Ma si pues comentâ e votâ ancje cence firmâsi.

PUNTEÇS, BONUS, PENALITÂTS
La zurie tecniche si limite a indicâ un ordin des contis, da la miôr a la piês. La conte che vinç e cjape i ponts dal numar di contis in gare ta chel mês. La ultime e cjape 1 pont. La conte che e je stade metude par prime di un zurât e cjape un bonus di 1 pont.
La conte che e à vût plui gradiment dal public e cjape 5 ponts. La seconde 3. Se van a pari, 4 par om. Se a rivin a pari in trê, 3 ponts a teste.
Se la conte e passe i 2000caratars, si cjape 1 pont di penalizazion ogni 100caratars in plui. Se però a vessin di sei mancul di 1500batudis al è proviodût il bonus “CURTISSIME!” che al regale 3 ponts in plui.
Se un mês propit no si cumbine di mandâ le conte, prin che al finissi il mês si pues zuiâ (une volte sole) il Bonus “NO CUMBINI!” e par chel mês si cjaparà come ponts la medie dai ponts di ducj.
[edit] Cui che si iscrîf prin dal 17 di dicembar al à un BONUS ENTUSIASIM di 3 ponts. Dal 18 al 23, 2 ponts; dal 23 al 31/12 1 pont di entusiasim.

IL TEME
Il teme lu sielç l’Ostîr, che al à za pensât i temis di dut l’an, che a sticin a scrivi e divertîsi e si fondin su la ambientazion, o su cualchi element di introduzi te storie o su la forme stesse de conte… Il teme al sarà gjenerâl, ma declinât par ogni concorint, in maniere casuâl.
Simpri al prin dal mês il teme e dutis lis declinazions assegnadis a vignaran pandudis sul sît.
Se propit un concorint nol sopuarte une cierte declinazion dal teme, al pues doprâ (ma dome dôs voltis) il bonus “CAMBIE!” e domandâ di declinâ il teme intune altre maniere, sielzude dal Ostîr, simpri in maniere casuâl, ma dentri des declinazions che son stadis publicadis.

IL SPIRT
La classifiche, i risultâts, la gare, i premis… a son dome robis par divertîsi e zontâ divertiment. Si partecipe ae CorseCurte par il gust di jessi, di fâ une robe biele e creative, di sbrocâ la imagjinazion, scrivi e lei storiis.

VINCIDÔRS E PREMIS
Clare che la CurseCurte24 le vinç cui che al è in teste ae classifiche ae fin dal an. Ma a vegnin premiâts ancje i campions di stagjon (Invier, Vierte, Istât, Sierade) e i prins doi di ogni mês. Al vinç ancje il prin dal FantaCorseCurte24.
Par savê ce che si vinç, ve chi I premis de CorseCurte24!

PAR CUI CHE AL RIVE DOPO
Si pues jentrâ in gare ancje dilunc dal an. Si jentre cui ponts dal ultin in classifiche (che al à scrit ogni mês) in ta chel moment.

E PAR SIERÂ
Ve chi lis rispuestis a lis domandis che podaressis vê. Plui si è e miôr al è. E al è simpri timp par molâ. Iscriveitsi!

2 comments