CC24Zenâr#22 – Une storie in plui

#22 – Une storie in plui

E jere parsore dal so sanc: une poce rosse e fisse che no podeve crodi che e vignìs di jê; alc di strani e veloç tant che un lamp, prin un scroc, une lusigne, e i colps a levin za fûr dal so cuarp. Cinc colps. Un sunôr che al sturnìs e daspó nuie, calme, un cidin complet. Une respirazion acelerade dongje di jê, un altri colp e il cuarp di lui che al cole parsore dal so. Cui al pensarès che chel agnul, chel che al prometeve di vuardeâle di ducj i mâi, al varès finît par jessi un sbilf sadic. Ancje lui al veve finît cu la vite, dal sigûr parcè che al varès vût di vivi cun intor la voglade di siei fîs, chê voglade che i varès dispueât la anime, chei fîs che a jerin restât vuarfins e cence protezion intun mont dulà che lôr pari al veve copât lôr mari e daspó si veve suicidât. Ce mont al jerie chest? Ce i restavie daspó di une robe cussì?
Salacor, e jere dute colpe di chescj sbilfs (o pûr diaui?) che a vevin ispirât cetantis liendis. Al jere plui facil imagjinâ che a fossin robis di fantasie, alc di impussibil. Un sbilf cui voli ros tant che flamis che al aparive dal scûr cun sgrifis… il cerviel al à pûr di cjatâ une spiegazion par dute cheste violence e crudeltât. Ma chescj, invezit, a son reâi e tangjibii, a van vie par lis stradis cu la muse di agnul, tant che il so om perfet. Al podarès jessi il to vicin, un citadin esemplâr, tant che in cjase sô al ten une vitime che e vîf un Infier in tiere, un calvari. Certis voltis si platin daûr di une buine façade, e no si ju viôt rivâ; altris voltis, cun impunitât, a fasin cualchi robe e nissun al fâs nuie.
Une storie in plui, la sô, non une di mancul.

di Cecilia Liva (La Ciachegna)
#1529

2 comments