Adiriture! Ben po, graciis! Ma da rest, cuntune cjante come La canzone di Tom, no podeve no vignî fûr che…
Zaraton al varà la Fiere…
L’Ostîr al à une gnove! Ma une gnove gnovissime eh…
E la gnove le viodês dute ta cheste locandine frescje frescje di Sartore, che us domande se… us plasarès vignî a sintî une storie dulà che ducj chei che o cognossês a morin! Ma cuiets, la robe e je dome intun dai multiviers de vite, dulà che al vîf nuiemancul che Zaraton, la creature protagoniste dal ultin libri di Rafaêl Serafin edit pe Kappa Vu.
E come che o vês intivât dal titul, Zaraton al va nuiemancul che a Idea Natale, ae Fiere di Udin, intal paveon (che no je une grande pavee eh) numar 6, inte suaze propite de fiere. E sarà une presentazion spetacul gnove, diferente, une vore curte, fate dome dai vues de storie e soredut e sarà une ocasion par cui che nol à o nol sa nuie dal libri fûr cu la cassele di Serafini Raffaele di scuvierzilu in maniere divertente e no stufadice.
O se no altri, se o sês ator par Idea Natale e o sês stufs dal casin e je une ocasion par vignî mieze ore a polsâ, a sintî l’Ostîr che us conte une storie e la Sartore che us lei un gjornâl radio multilengâl… e magari, se o vês voie, par fâ dôs cjacaris e recuperâ cualchi altri libri de Kappa Vu, par fâ i regâi di Nadâl o chei di Pasche o chei di San Rindul.
Insome… il Dipartiment di Criptozoologjie di Contecurte al contarà cheste storie a chei puarets spierdûts pe Fiere di Udin che a àn dome voie di scjampâ, e ur larà propit ben scoltâ une storie dulà che a morin ducj!
Us spietìn!
Chei di Contecurte
Achì sot o podês scjamâ il pdf de locandine par talian e furlan:
1 comment
Lasse une rispueste
Dutis lis contis
Ricuardimi cuant che al cole San Rindul che no mi visi…