Il Quiz dai Mês a… Cjarlins!

No vin nancje rivât adore a scrivi un  biel articul su la serade di sabide stade e il spetacul Zaraton che ve ca, o sin di gnûf in vore par puartâ ator il libri dal an, ven a stâi Lis contis dal mês. E come che aromai o savês, o vin metût adun un spetacul di gjoldi cun dentri un pôc di dut, par no stufâsi.

Si che, come che o viodês te locandine chi parsore o che podês lei intal event facebook (anzit, invidait che nol fâs mai mâl) VINARS AI 14 DI AVRÎL, li de Biblioteche di CJARLINS, tor vot e mieze sot sere, o podarês partecipâ tant che public di gale al QUIZ DAI MÊS, une disfide dulà che doi concorints si daran bataie par viodi cui che ’nt sa di plui di usancis e tradizions furlanis.

No podìn spiâus masse, ma che o sepis che VIRILIA ASTRIDI e sfidarà GORTANO PABLI intun duel definitîf che al cor sù e jù pai mês dal an. E a judicâ dut al sarà SERAFINO RAFFAELLI, e a presentâ dut e sarà FOGOLINA SERENI e a fâ di valete GALLERIA GIORGI, e a fâ fotografiis STEFANUTTO STEFANI e a lei narative di cualitât TAMO FRANCESCHI… ce volêso di plui? Une seradone dulà imparâ alc di furlan e magari fâsi ancje cualchi ridade. E ancje scoltâ un pocje di biele musiche cuntun mini conciert dal duo acustic ConFusione, di MARGHERITA MARTI E MARTA MARGHERITI.

Duncje, o sês ducj invidâts al grant quiz televisîf! E vonde ca, no us disìn altri par no lâ a risi di ruvinâ lis sorpresis de serade! Us spietìn ducj a Cjarlins, par festegjâ la Patrie cuntun libri che al conte il nestri Friûl sedi cuntun voli naratîf, sedi cuntun altri storic e etnografic!