CorseCurteDicembar#18 – Come un floc su la lenghe

#18 – Come un floc su la lenghe

Ti visistu di cuant che o jerin piçiui?
Chês voltis che lis previsions dal timp a prometevin che al varès neveât cussi tant e che tu savevis za la sere prime che il dì dopo no saressin lâts a scuele?
Jo mi ricuardi ben la buinore. No coventavin svearinis o lis bocjis de mame par saltâ fûr dal jet. E daspò, vie di buride a tirâ sù lis persianis par viodi se le vevin imbrocade.
E ce gjonde cuant che al sucedeve pardabon.
Fâ di gulizion intun marilamp, vistîsi ae svelte cun alc che si podeve bagnâ e sporcjâ e po vie tal curtîl a balonâsi.
E lis mans che ti deventavin rossis come che a fossin in bore, stant che cun lis manecis la nêf no si ingrumave ben par fa lis balis. E ce batais cun la mularie dal borc. E ti visistu di Sandri, chel fantat plui grant di nô, prepotent e antipatic, che al striçave cussi tant la nêf tes mans che ti rivavin di chês tonadis, come se ti ves claponât… cuissà ce fin ch’al a fat.
Ce biel che al jere ancje cuant che o decidevin che e jere rivade la ore di fâ sù il pipinot, tirant dongje dute la nêf pussibil, ancje chê plui cragnôse dongje de strade. Robant la scove che e doprave la none tal camarin e la gjachete di vore dal pai e la barete dal nono, chê che al meteve cuant che al leve a dâ sù solfato.
La robe che mi plaseve plui di dutis, dutcâs, e jere cuant che al tacave a flocâ intant che o jerin di fûr. Mi instupidivi a cjalâ par aiar inçussît dal sgurlâ dai flocs, vierzint la bocje e tirant fûr la lenghe par cerçâ ce savôr che e veve cheste maravee blancje che e colave dal cîl.
Cumò mi sa che nol sarès il câs di fâlu, cun dute la cragne che a àn sparniçade pal aiar, cuissà ce che ti ven dongje…
Cumò al è dut diferent. No ven cuasit nancje plui, la nêf.
E cun jê si è smavide ancje la magjie di cuant che o jerin fruts.
Sâstu, in fin dai conts o crôt che o sin deventâts ducj un pôc come chel floc di nêf che mi si poiave su la lenghe e lis robis bielis, lis maraveis, a pene che o rivìn a viodilis, si sfantin intun marilamp.

di Michêl Londar
#1450

1 comment