CorseCurteDicembar#17 – La nêf tal cûr

Mi conte mê none, che int sà simpri une plui dal diaul, che agns indaûr si fasevin robis orendis. Vuê no si varès nancje di contâlis, ma aromai a son ladis in prescrizion.

Plui di cent agns fa, cuant che il clime al funzionave, di Invier a vignivin neveadis grandononis. No che al cambiàs alc ae int, parcé che si scugnive lâ a scuele e a vore istès: cuntun pâr di balarinis e une gjachete che nô, vuê, no metaressin nancje pe mieze stagjon, si jesseve di cjase batint i dincj.

E propit lant a fâ fature, une buinore cuntun metri di nêf, il cusin di Taresie dal borc dabàs al passe fûr de sô cjase in biciclete. Al sint dut tun moment a vuicâ, ma nol capìs di dulà che al rive chel lament. Al mole il manuvri e si dirêç viers il sotpuarti; une voglade svelte i fâs scuvierzi che là in bande, te nêf glaçade, svuedât come suntun sac di flôr che al stâ finint, al è il so piçul nevôt crot, nassût juste cualchi zornade prin.

Taresie no je veve fate: la idee di vê ancjemò une bocje di jemplâ i meteve masse pôre, no crodeve di rivâ a lâ indevant. Nancje dîlu so cusin nol pues lassâ murî la creature te glace; cjapât sù il cuarpesel, lu torne a puartâ dentri, dongje dal fogolâr, preant l’aiût de mari. Ma Taresie no à voie di savênt; scjampade par lâ a cirî il predi, e cor inçopedantsi sù pe rive, in lagrimis.

Se il Signôr al savès tantis robis de vite su cheste Tiere… ma ce colpe âno i frûts? Dome che no simpri a àn la furtune di nassi tal puest just e di gjoldi di une vite degne e legre. Salacor, cualchi volte, al è miôr no nassi par nuie, pluitost che sufrî.