CorseCurteDicembar#16 – Yeti

#16 – Yeti

Il sun profont e penç al creve la gnot.
— Un lôf nol berle cussì, dai! Al scugne jessi alc altri. Une besteate teribil che…
Ma il resonament al ven çoncjât di une vosade.
— Velu!
O saltin fûr di corse dal fossâl. Si sint cricâ alc e si spere che al sedi il boscam e no ciert i zenoi o cualchi altri vues ancjemò vîf. Ducj a vosin pontant par aiar une arme, cui un baston, cui un mani di scove, cui un racli malsacodât.
L’inseguiment al è dut un talpassâ inte nêf. Dificil lâ dilunc cuant che tu âs mieze gjambe che e sprofonde intal fof. Un di nô al cole par denant. Il so compâr al cîr di tirâlu sù, ma al cole ancje lui. Blestemis a grops intal scûr smavît dal lusôr di lune.
— O pensi jo a Gaston. Tu côr daûr dal yeti!
O cjapi in man il len di un di lôr e o voi indenant a cori. Ju lassi che si vongolin te nêf. Nuie pôre. Gaston al è çuet e al podeve stâ a cjase. Rico al à il *pacemaker* e al è miôr che al stedi cuiet.
In curt o soi daûr dai vanzâts. Ju sint sfladassâ di brut, ma il yeti al è denant di lôr. Lu vin fat scjampâ plui di une volte, ma usgnot al è dal gjat!
Fin cuant che bot e sclop al sparìs, come glotût dal nuie. Altris blestemis. Nancje i sants no vegnin sparagnâts!
Di gnûf chê urlade sorde e spaventose. Une ramace colmenade di nêf si sbreghe di un arbul lajù insom. Al è platât daûr. Si viôt scjampâ une sacume grise. E nô vie daûr, di buride, disombolâts, cu la bocje vierte a rindi plui grant il respîr. Aromai lu vin a cincuante metris.
Inte nêf che e floche cuasi a menânus pal boro, o viôt che il yeti al tire alc in bande, daûr un baraç. I miei compagns no si inacuarzin. A fasin za fature a tignîtsi impins. Jo mi fermi e o recuperi il toc.
Un tubi riât di plastiche. Ma ce robe ise? E subit o capìs. I miei amîs si fermin e si voltin a cjalâmi. O meni il tubi a cercli parsore il gno cjâf fasintlu zirâ svelt e… o sint la vôs tremende dal yeti.
Une ridade si zonte al sunôr. Poiât a schene intor di un arbul, respirant a plen pet, Martin al à za disleât la tute pelose e nus cjale sbeleant.

di ***
#1***

1 comment