Il gnûf imprest pe lenghe furlane

Une des robis che dome la Sartore e cjate il timp di fâ, ta cheste Ostarie, e je chê di rignovî e inzornâ la pagjine che e met dongje ducj i imprescj furlans in rêt che a puedin sei di jutori a cui che al vûl scrivi/lei/discuvierzi la marilenghe.

L’Ostîr, par dîle dute, nancje no si visave che le vin, cheste pagjine, invezit la Sartore le à inzornade che al è pôc cuntune novitât impuartantone.

Ancje se nol pâr, o sin une vore siôrs di imprescj linguistics, e soredut al è cualchidun che di desenis di agns si sbat (e si sbat une vore) par meti adun struments gnûfs e utii par ducj, adiriture di rive jù.

Un di chescj, cence fâ tancj nons ma dome i cognons, al è Carrozzo.

No dome lui, clare, ma lui, Sandri, Camarîr de nestre Ostarie intai prins agns, dentri de suaze de cooperative Serling, al à metût dongje e publicât di pôc in rêt un strument pe lenghe furlane che – robe avonde incredibile – al mancjave e che nissun al veve pensât di fâ. Se o sês Contecurtârs fidâts o savês ben di ce che o stin fevelant, si no, ve chi: IL DIZIONARI DE LENGHE FURLANE.

Il dizionari al è propit ce che al dîs di jessi. Un dizionari. Ce us vegnial tal cjâf cuant che par talian us disin “prendi un dizionario”? Un libri grant e grues dulà che dentri tu cjatis dutis lis peraulis, o cuasi, e la spiegazion di ce che a volin dî. Un libri che clare, al è pai talians e al è scrit dut par talian. A nissun, o crôt, i vignarès tal cjâf di scrivi alc in altris lenghis.

Ben po. Un dizionari furlan nol esisteve.

Cumò al esist.

Lu cjatais achì, a chest leam, sul sît dulà che o cjatais ancje altris imprescj.

Clare, no podês pensâ che al sedi complet. Par meti dongje cheste opare mestre dal 2020 al 2023 a son stâts dâts dai contribûts parziâi, che a cuvierzevin in part la dibisugne. Di chê volte chei che a lavorin lu fasin di rive jù, ma stant che al è un strument che a crodin, e ancje nô o crodìn, che al sedi di fonde par une lenghe, a van indenant.

Par chest, se o podês e se o pensais che al sedi un strument util, o podês judâ cun 10 euros ad an, di chi al 2030, date che si stime e podedi viodi la vore finide. Prime di decidi, us consein però une robe.

Provait!

Vait su la pagjine dal Dizionari de Lenghe Furlane e cirît une peraule che us plâs e e leieit. No à di jessi une peraule che no cognosseis. Us baste une cualsisei peraule par capî la puartade inovative di chest progjet. Dongje des peraulis o cjatais lis frasis che a doprin la peraule e che us regalin sedi un contest par capîle miôr in dutis lis sôs sfumaduris, sedi une ispirazion di lenghe furlane, par discuvierzi autôrs e tescj. Noaltris di Contecurte, lu savês, chest lavôr lu vin za fat.

Se dopo chest si sês convints dal progjet, o podês fâ la vuestre donazion fracant achì.