La Stagjon des Contis: la prime presentazion

Ben po… ce covential butâ fûr un libri, se dopo no tu lu puartis ator? E noaltris no vin dal sigûr voie di straça il lavôr dai nestris Corsecurtârs e la fadie dal Ostîr intal metile dongje, si che… Ve ca la gnove dal mês di Març!

Vinars, ai 22 di chest mês, a Codroip, aes vot e mieze sot sere, nuiemancul che li de Sale Abaco (Graciis Pierina!) o provarin a fâ la prime presentazion dal prin libri di narative curte par furlan scrit di une Ostarie, ven a stâi, LA STAGJON DES CONTIS, cun dentri un struc di 60 storiis di centancj gjenars e autôrs che a son saltâts fûr inte CorseCurte dal 2022.

E stant che o vin za sintût i vuestris pinsîrs… ve che us rispuindìn, un par volte, popul dal “Eh, ma…”.

“Eh, ma… jo o ai za il libri, che lu ai cjolt ta chê dì de Gruesse Sorprese… parcè varessio di vignî a Codroip?

Dîs po, ma crodistu pardabon che noaltris a fasedin une presentazion? Crodistu che si metedin li a contâ cumût che al è saltât fûr il libri e ce che al è dentri e blablabla… Ma par cui nus âstu cjapât?!? Tu sâs che il nestri Ostîr a si stufe di dut e subit. Al è za daûr a pensâ di fâ un spetacul e cun storiis gnovis, che no son intal libri! Sì che… Tu ti divertissis istès!

“Eh, ma… jo il furlan lu feveli, ma leilu… eh, o fâs pardabon une vore di fature. No sai se un libri dut par furlan mi interesse”.

Ma cjale, al è propit a ti, che al di interessâti! Chest al è il libri furlan perfet par lei par furlan e usâsi, stant che lis storiis a son dutis curtis, tantis a son pardabon facilis di lei e altris a son lizeris. Cussì si impare e si usisi a lei par furlan cence fâ fature.

“Eh, ma… jo no ai timp di lei. Pardabon… sarà 120 agns che no lei un libri intîr. O ai une vite intense, il lavôr, la famee, il cjossul…”

Ah, ben, ma alore tu colis a plomp come un biscot tal cafelat! Tu compris chest libri, tu lu metis su la plane dal bagn, e invezit di passâ mieze ore a scrolâ i social e rincoionîti cul to algoritmi, tu leis une conte o dôs. A son fatis di pueste! Timp cuindis dîs e tu lu âs finît, tu viodarâs!

“E ma cjale, va ben dut, ma jo, une cuvierte brute come la vuestre, propite no le sopuarti, mi splâs ma chest libri no vuei vêlu e alore no ven nancje a la presentazion!”

Ma cjale, a di part che propit la la sô cuvierte, brute in maniere provocatorie, tu varessis di cjoilu par regalâlu a cui che ti sta sui coions, tipo par fâ un dispiet. E crodimi, un dispiet al vâl ben 10 euros. E po, ancje se dal libri no ti interesse nuie, no tu puedis restâ indiferent a lis ONTECURTUTIS! E a saràn ancje chês, ta chê sere… E se no tu sâs ce che a son… ben, cumò tu sês in tuart tu, ti tocje vignî!

“Bon, tu mi âs convint. Però pûr trop no cumbini di vignî ta chê sere, che o ai un altri impegn. Pecjât… puedio cumbinâ di vê istès il libri?”

Benon, cjale, ancje se no tu vegnis tu puedis in ogni câs dânus une man e condividi chest post, o invidâ la int dal event FB o dal nestri canâl Instagram. E po, par vê il libri, se tu sês usât a comprâ de rêt, tu lu cjatis a facil in Amazonie. 

Se o vês altris domandis, podês fâlis intai coments e l’Ostîr al ven dal sigûr a rispuindius. Ma cumò lassait che al ledi a scrivi il copion, che al à prometût maraveis e maraveis i tocje fâ.

Si viodìn vinars!

E chi sot o podês scjamâ

La stagjon de Contis A5  par cui che al à voie di stampâ la locandine e dâle fûr, par dânus une man a sparniçâ.

La stagjon de Contis (A3) par cui che al à une bacheche e al vûl picjâ la locandine grande.

4 comments