CC24_La classifiche di Zenâr

E lu savìn, che no resistevis plui. Ma vuê o sin ai 16 dal mês, zornade di contribûts, di IVA, di paiaments, ma ancje inovâl di Contecurte. E stant che la nestre zurie e à fat un lavôr puntuâl e acurât, e stant che l’Ostîr al duar pôc, ve ca, us fasin sveâ cun dutis lis classifichis e un biel pocjis di novitâts.

Tachìn!

ZURIE

Al è sucedût di dut, cu la zurie… Ma noaltris de Ostarie o pensin che ogni dificoltât e je une ocasion par fâ miôr. E alore al è sucedût che la nestre zurade dal forest, la parigjine, e à scugnût dâ forfait. Ce vino fat? O vin radoplât!!! Ven a stâi che o vin cjatât un altri zurât dal forest, Augusto Bornancin, de clape di Buenos Aires, che al darà un judizi di un che al à imparât a lei e scrivi par furlan di pôc e soredut al sarà un bon riferiment, stant che tancj mus a scrivin de Argjentine. Ma stant che nus someave che une sole femine in zurie no fos une buine robe, o vin cumbinât ancje une altre zurade, Sara Meneghin, che e lei simpri dutis lis contis e che e darà un judizi di “letore furlane”, cence tancj tecnicisims, che a restin su lis spalis di Carli e Donato. Il nestri Ostîr, dut câs, al va indevant a judicâ savint ancje il lavôr che al è stât fat prime de publicazion, e Raffaella, furlane raventade, e presearà dal sigur plui lis storiis scletis. Insome… une zurie diferente, che nol sarà facil meti dacuardi, e al è biel cussi.

VOTAZIONS

Us visin subit che, cun 6 personis in zurie, dal mês di Fevrâr invezit che 5 ponts, il premi dal Public al valarà il dopli, 10 ponts. Dopo 7 e dopo 5. Al è just che cui che al ven votât dal vedi la possibilitât di fâ un saltut di classifiche. Ma in ogni câs, ce che si è viodût in cheste prime tape e je une grande variabilitât di gradiment. Dutis lis contis, ancje chês che a son rivadis insom de classifiche, a àn sodisfat i guscj di cualchidun de zurie. E cun di plui, la classifiche, in ciertis bandis, e je stade une vore, ma une vore curte. Cun di plui, o marchin che cun 6 in zurie lis penalitâts par une conte un pôc plui lungje no contin cuasi nuie.

CLASSIFICHIS

Ma vonde cjacaris, va, che o seis là che o murîs di curiositât. Ve ca dutis lis classifichis. La prime che us mostrin e je chê in detai. No si viodin lis votazions dai sîs de zurie, ma o podês viodi la medie e la deviazion standard (plui e je basse, plui la conte e je plasude inte stesse maniere). Lis contis in nerut a son chês che a son stadis metudis al prin puest di un cualchi zurât. O cjatais ancje i bonus (fedeltât e prin puest) e lis penalitâts (caratars in plui). E o cjatais ancje i temis e i caratars (cirche) des contis.

In sumis… o vin decidût pe strade de clarece e us mostrìn dut.

Ce vino di dî su cheste prime tape, in spiete de croniche plui a fonts che Ticât dai Mus al fasarà su Radio Onde Furlane... ben, vin di dî che o vin un vincidôr clâr, che al à comedât ducj chei altris mus. Si trate di une musse, Catine la Nere, che cuntune conte nere come il so non, curtissime e misteriose, e à poiât jù un caric che al è plasût a dute la zurie e ancje al public. Ma il biel al è che al secont puest al è rivât Muspilli, un altri che al veve il teme “boboros”. Ma a chi lis distancis a son une vorone curtis, parcè che i tierçs, Matungo e Secretariât, a son indaûr di un pontut, e tignût cont che a jerin ben 31 ponts a disposizion par ogni zurât, si pues ben dî che fin al puest numar 9 a son ducj in “zone champions”. Mus e mussis di raze, come Brene Sfolmenade, Teresine la çiete, Glorious Grene, Daûr la Lavagne e Torototele… cun contis che a son dutis ben poiadis. Baste cjalâ la medie des votazions… une vore alte.

Dopo o vin une classifiche di mieç dulà che di spes si cjate ironie e contis plui lungjis e zuiarinis. E in gracie dai tancj partecipants, Tiremole, che si è zuiât il bonus No Cumbini! al à fat une vore di ponts, rivant a mieze classifiche. Ultime robe di marcâ e je che ancje il punteç plui bas, al è un punteç alt, che al permet bielis rincorsis. Al baste cjalâ la colone dal var, che e à numars une vore alts (ven a stâi contis che al stes timp a son plasudis tantonon e pôc)

In gracie di cheste classifiche intal detai us lassìn ancje la classifiche gjenerâl, ancje se al è clâr che e je compagne a chê di Zenâr. Vele ca (ma no stês cjalâ la percentuâl che no je juste):

E al FantaCorseCurte? No son stâts tancj votants, ma si è za capît che i nestris letôrs a àn une vore di nâs. La plui part e à imbrocât lis contis miôr, fasint subit biei ponts e ben trê di lôr a son a pari merit al prin puest. Ancje ca la gare des scomessis si fâs interessante…