Lis Aventuris di Lupo Manarie

Stant che a Otubar, il Cocecurte al è vignût un spetacul, o vin pensât ben di meti inpins un altri spetacul, ma chest colp… UN SPETACUL PAR FRUTS!

Ma nuie pôre, stant che o vin delegât la organizazion de robe nuiemancul che a Lupo Manarie… o sin dal gjat, o miôr, o sin dal Lôf!

Lupo Manarie, che come che o savês al è il membri di Contecurte plui amât dai plui piçui, ma ancje dai plui grancj e stupiduts (Di fat, l’Ostîr al rît come un mat in dutis lis sôs aventuris) al à dit che nus judarà a sielzi lis contis curtis che a puedin plasê sedi ai fruts, sedi ai grancj e forsit… al vignarà lui a presentâ la serade!

Cussì, noaltris di ConteCurte, o vin pensât ben di fâi cualchi domande, par savênt alc di plui. Ve chi une piçule interviste che e varès di disvelâus dut, o cuasi

CC: Mandi Lupo, ma sint… isal un spetacul dome par fruts?
LM: Rrrghrrr (al rugne) Ma no ve po! Lis contis par fruts a son bielis storiis, e a plasin a ducj, parcè che lis bielis storiis a plasin a ducj! Anzit… cualchi volte a plasin plui ai grancj!

CC: Benon, alore. Ma sarano storiis par talian o par furlan?
LM: Son storiis come me, che mi clami Lupo Manarie, ven a stâi un pocjis par talian, un pocjis par furlan. Stant che jo o ai tancj amîs e a san tantis lenghis.

CC: Alore no tu nus contis dome lis tôs aventuris.
LM: Ah, no. Us contarai cualchi aventure des mês e cualchidune di cualchi gno amì, che bon… no je propite inta racomandabile e dispès a son mostris, rahrarh arhrggh (al rît), ma i mostris a àn simpri bielis storiis di contâ! E no saràn dal sigûr lis solitis storiis che si lein sot Nadâl dutis gnegnegne.

CC: Ma nus puedistu spiâ alc di plui?
LM: No ve po! Ma us pues dî che o dal sigûr o varìn chei di ConteCurte a lei lis storiis e che ae fin al sarà un biel ghiringhel par ducj. E magari ancje cualchi regalut, e magari a vegnin i aliens, o l’Ors di Orsarie, o Anute Panti, o la Bibliocheche, o Cjossul o cualchi altri dai gno amîs… insome, o ai inmò di fâ dut e fineitle di domandamROOOARROOORRUUUUUUUUUUU! 

Bon, nus pâr che la interviste e sedi finide, o almancul e je dal sigûr finide la pazience di Lupo Manarie. Us disin dome che li parsore o vês la locandine, che chi sot us metin une altre, che achì o vês la locandine dal event di podê scjamâ in formât grant par picjâle ator.
No nus reste che dîs che la serade e je Vinars ai 29 di Dicembar, li dal Spaccio Raffl a Gjalarian, aes 5 sot sere!

Us spietìn!

1 comment