Il Quiz dai Mês… a Cormons!!!

E vele ca, une gnove che o savin ben che o spietâvis. Nuiemancul che une gnove serade de nestre Osterie par puartâ ator il prin libri che o vin scrit, poiât su lis contis dal Ostîr e sui articui de Coghe e cu la poie di ducj chei de Ostarie. Sì, o fevelin dal libri dal an, ven a stâi, Lis contis dal mês, che o vin bielzà puartât ator cul spetacul a Montenârs, a Cjopris e a Muzane e cumò o rivin ancjemò un pôc plui lontan, nuiemancul che… A Cormons!

Stant che vuê o sin lunis, e us rive la mail di gnovis de Ostarie, us din la gnove une vore adore, cussì o podês meti la serade tes vuestris agjendis. Insome… Vinars ai 15 di Setembar, tor 7 e mieze sot sere, a Cormons, inte Suaze de Fieste de ûe, o varìn ancje il nestri spetacul “Il quiz dai mês” che ancje se lu vês za viodût o savês che al cambie simpri. Par cumò, dal sigûr, o varìn la super Fogolina Sereni, a conduzi il bal, e l’innomenât Serafino Raffaella.

La locandine, dutcâs, e je provisorie, a mancjin un pocjis di robutis e viodìn se sâstu mai che tiredin doncje cualchidun, ma la date e il puest no si cambiin, achì o cjatais i tancj events de Sagre, che no si sa mai che o vedis fan e sêt di vin bon. Par intant noaltris i disin graciis ae associazion Lis Tarlupulis, che e je vignude a cirînus. Par cumò vonde… ma dal sigûr us tornarîn a visâus de robe plui indenant. Intant o tachin a scrivi un biel copion pe serade, par meti dongje narative, culture furlane e dôs ridadis che no fasin mai mâl!

Locandine di discjamâ