Contecurte te Panarie – Jugn 2023

Lu savìn, lu savìn… o sin un pôc cidins, ma no sin in feriis. Anzit… ve che ca di un moment us disarìn di un event avostan galatic dal nestri Ostîr che no si pues mancjâ.

Ma intant, par no lassâus cul sut in bocje di contis e culture, ve chi che us contin ce che al è lât a finîle inte panarie numar 3 dal 2023 e anzit, par fâ lis robis par ben us contìn un pôc di dute le panarie, che come che o savês e je une riviste storiche ma che e à une vore di fastidis a sorevivi (economics, clare) e insome… se us ven di abonâsi o di comprâle o fasês dal ben.

Ma vonde cjacaris. Sore o vês viodût la cuvierte… ma chi in bande us lassìn la liste dai articui ripuartâts tal somari, si che o podês fâus une idee dai contignûts e di ce che si cjate dentri (e viodêt che e je pe plui part par talian, eh). Si varès di viodi ancje dulà scrivi e dulà lâ a cjoli la riviste ma insome… cjalait, scrivêt une mail a redazione[caiut]lapanarie.it e disêt che us à mandât l’Ostîr di Contecurte e us trataran come che si conven.

Ma insome… anìn al duncue! Ve ca sot, come che us disevi, la presentazion dal Ostîr ai tocs sielzûts par il numar di Istât de riviste. Al è lât a cirî contis a teme, curtissimis e vieris, di maniere di lâ a tirâ fûr di chel vin di cantinis che aromai, al pâr, no àn plui la vigne e se le àn no vendemin. Ma insome… il biel de nestre osterie al è che une volte che tu âs un tai di vin (une conte) tu puedis bevilu e tornâ a bevilu e ofrîlu a ducj, cence fastidis.

E alore ve ca la la nestre pagjinute. E se vês voie di lei lis contis o chei altris articui, ve li, al baste lâ a cjoli la Panarie!