Fantasience Sociâl Furlane di no pierdi!

Alore… lu savìn ancje masse ben, che la Ostarie e je un tic cence int, di resint. L’Ostîr al è impegnât intai fats de vite e al à mancul timp di inventâsi matuçadis par tirâ dongje contis, e la int cu lis sôs contis e je un tic sflacjone e no mande masse robis. Juste il famei, di tant in tant, al ven a ofrî un tai. Ma tant par no che o crodedis che o stin dal dut cu lis mans in man, che chi, che l’Ostîr e cualchi contecurtâr il nâs fûr lu metin.

E si cjacare nuiemancûl che di Stiefin Morat, contecurtâr che nus ven a cjatâ da râr ma che nus à regalât i miôr libris di fantascienze sociâl e fantastic par furlan. La sô gnove vore, jessude pe cjase Editore B#S, e je di pôc jessude e achì sul sît o cjatais un pocjis di informazions, ma se ancje voaltris o sês sflacjons par leilis e us interesse il libri, us disin che SABIDE DI SERE, 17 di Jugn 2023,  tor 6 sot sere, a Tisanote, dongje des sculis primariis, o podês vignî a sintî cjacarâ dal libri e a cjolilu. E nol è di bessôl, Stiefin… ma cun lui al sarà ancje l’Ostîr, che daspò dal super spetacul di Codroip nol à plui metût man al so Zaraton, e ancje in chest câs dal sigûr plui di cualchidun al pues jessi interessât a lei de so storie scalembre, publicade de Kappa Vu.

In sumis, une serade di no pierdi, e mighe dome par la presentazion di doi libris… a son ancje a sunâ, e al sarà ancje di bevi. Vino di lei e je pardabon une manifestazion complete, di chês che nus plasin a noaltris de Ostarie. E o sês ducj invidâts.

Cun di plui, come che o podês viodi ca sot, in bande di doi libris si discuvierç ancje… un curtîl! No stêt mancjâ!