Un viaç tal Cryptofriûl… partint di San Denêl!

Veso presint il nestri Cramâr? No?

Clare che no lu vês presint! Aromai nol fâs mai nuie, nus mande lis sôs rubrichis di traduzion ecumenichis ogni muart di Pape e la uniche volte che o vin cirût di fâi fa un toc di spetacul a nol veve nancje viert la mail cul copion e al jere capitât li par câs.

Ben, nuie mâl, Pablo o savin ben che al è fat cussì. Ma un pâr di mês indaûr, cuant che o vin fat il spetacul di Cjopris, no nus capitie a sorprese framieç dal public!

E voaltris si starês domandant: sì, bon, ma di ce ostie al fevelial chest ca… E nie, subite dite! Ae fin dal spetacul di Cjopris, il nestri Cramâr, che lu vin viodût che si gjoldeve di gust, nus à dite che… al jere il plui biel Spetacul di Contecurte che o vin mai fat!

Insome… su lis primis o volevin pestâlu, stant che di spetacui o vin fats une vorone, ju cjatais achì e no son nancje ducj, ma dopo o vin pensât che insome… al jere un biel compliment.

Ma la cuistion e je cheste. Cumò ducj voaltris là di fûr che a Cjopris no jeris sarês plens di fastidis parcè che no vês podût viodi chest super spetacul… e cui sino noaltris par no contentâus? E alore…

Joibe, ai 7 di Lui, a San Denêl, te cort de Biblioteche Guarneriane, o vin metût adun di gnûf il spetacul Un Viaç Tal Cryptofriûl, une trasmission televisive che e trate des maraveis di un Friûl discognossût, gjavadis dal libri dal Ostîr che al à vinçût il San Simon dal an passât.

E nie… dut ca. Ancje masse dai. O cjatarês cuasi dute la ostarie al complet, une suaze prestigjose, un copion incredibil, efiets speciâi… O sin ducj pronts par un viaç tal CryptoFriûl!

ps. Ve chi l’event fb, se o vês gust di invidâ int.

1 comment