Premi Richinvelde a Coghis e Ostîrs

E no us vin dite nuie, no tant par scaramanzie, cuant pal fat che noaltris de Ostarie no abadin masse a sparniçâ ce che o fasìn di ca e di là ator pal mont. Ma come che nus àn dit îr  di sere ae presentazion di Cryptofriûl (vignude une vore ben, nus pâr) se no si dîs mai nuie al va a finîle che o deventìn de “cryptoint” come che di spes a son i furlans… Cryptofurlans, apont.

E alore contìn! Îr di sere, a San Zorç de Richinvelde, si è davuelte la premiazion dal Premi Richinvelde, il premi leterari inmaneât de Pro Loco San Giorgio della Richinvelda APS e che l’an passât lu veve vinçût il nestri Ostîr. E il biel di chest premi, metût adun cuntune vore di passion e voie tignî bot al mont che al cole sburtant la culture e il teritori, al è che si pues mandâ contis sedi par talian, sedi par furlan.

Il teme al è simpri “Racconti tra Meduna e Tagliamento” e il sot titul al somee invidâ a gnocis i contadôrs de nestre Ostarie, par cè che al sburte a contâ “Storie vere o fantastiche ambientate tra i due fiumi“. E insome… o vês di sigure intivât dal titul di chest articul che la Coghe e l’Ostîr a àn mandât la lôr conte e… a son plasudis!

Il Premi Richinvelde lu à vinçût nuiemancul che la nestre Coghe! Serena Fogolini, cu la conte Sclapaduris e à concuistât la jurie, componude di Claudio Romanzin, aromai fidât letôr des contis par furlan, di Guerino Ermacora e di Alessio Alessandrini. La conte “nus puarte in ponte di pîts intal mont di Claudio e in pocjis pineladis doprant un furlan pulît e une vore coret, e rive a piturâ un ritrat sincîr, cuntun personaç taront, siôr di umanitât, che nus jentre intal cûr e che al sburte a cjalâ cun voi diferencj chei claps crevâts che o vin simpri metût in bande.”

E noaltris, che insome, o vin la coghe di cjase, us lassìn chi parsore la fotografie di Agnul che al ritire il premi e chi sot l’incipit de conte:

Al jere mat. Mat sclapât, come un di chei claps che i tucavin cuintri i ombui e che al recuperave intes gravis dai magrêts. Colms di lune mancjâts, planets grumbolâts, univiers macolâts. E po dopo a jerin i cûrs. Centenârs di cûrs. Cûrs che nissun al varès mai cjapât sù. Nissun fûr che lui. Ticâts, sclesâts, fruçâts.

Claudio ju sielzeve cun cure, lassant che e fos la lor presince a indreçâlu sul troi, a plasmâ la cjaminade, a cjareçâ il pît traviers la suele fruiade. I plaseve spassizâ ufrint la muse al aiar, i voi sierâts viers il soreli, a creâ danzis scalembris di balarinis indoradis e vencui neris daûr des palpieris.

E insome… lu savìn bielzà che cumò o vês voie di leile dute, e viodarin di fâ in maniere di contentâus. Tant par scomençâ parcè che la Pro Loco, come l’an passât, e à metût adun une publicazion semplice e une vore ben fate, che si pues cjoli cuntun piçul contribût intes ediculis dal Comun di San Zorç de Richinvelde o li ator, o pûr li de Pro Loco o telefonant al 3486443824. Ma soredut,  stant che la Presidente, Anna Tramontin, e je stade parone di cjase maraveose, regalant une copie in plui al vuestri Ostîr, ve li, o vin decidût che cheste publicazion e sarà il premi par il FantaCorseCurte di Invier!

Ven a stâi che cumò no vês plui scusis par lei lis contis e votâ cuale che o vês miôr de tornade dal mês di Març.

E a proposit di Ostîr… no je finide ca, parcè che il nestri Ostîr al à ben figurât ancje chest an, secont in classifiche a pari merit cun Vite tra i Sassi di Carolina Zanello. La sô conte, Di clap a piere, e à metût adun une storie cun dentri un Luigi Del Bianco di frut e un so amì che si clamave simpri Vigji. Inte storie, “la aderence ambientâl, la biele origjinalitât de organizazion dal test, la eficacie comunicative de narazion, insiemi cu la coretece sintatiche-ortografiche de esposizion che si esprim intun lessic di bon nivel, e sburtin la jurie a conferî il secont premi.”

E insome… ce disi di plui? Che lis dôs contis par furlan, intun trop di contis par talian, a àn ben figurât e che o vin une vore di gust che di chê strade la Coghe e l’Ostîr a si sedin gjavade cheste sodisfazion.

4 comments